Xefe estadu dadaun promulga de’it OJE ho montante billaun US$2-resin, tanba kriasaun Fundu Kombantente Libertasaun Nasionál iha OJE 2023 ho montante billaun US$1 ne’e, Tribunal Rekursu deklara ona katak, la bazea ba Konstituisaun Repúblika Demokrátika Timor-Leste (KRDTL) ka inkonstitusionál.
"Ha'u promulga tiha ona, tanba fundu veteranu monu tiha ona. Orsamentu jeral ne'e hatun tiha billaun US$1 ne'e, sai billaun US$2,1 nune'e", dehan Horta iha Palásiu Prezidensiál, Bairo Pite, kinta (15/12).
Tanba, molok halo promulgasaun, xefe estadu mós konsulta ona ho Prezidente Tribunal Rekursu, liuhusi nia jurísta sira.
"Konsulta sé nune'e ona bele promulga kedas ona ka la'e e sira hatete bele,"afirma nia.
Tuir Xefe Estadu katak, fundu veteran mak monu ka hasai, maibé orsamentu seluk la monu, tanba ne'e halo tiha promulgasaun atu governu bele prepara ezekusaun Orsamentu hahú iha 01 fulan-janeiru tinan 2023.
"Lalika parlamentu kurizi ka saida, tanba buat monu tiha ona, purtantu ohin ka aban kuandu públika iha jornal da repúblika, mak ne'e ona", hatete nia.
Antes ne’e, iha loron 17 fulan-novembru tinan 2022, Parlamentu Nasionál (PN) liuhosi reuniaun plenária, aprova proposta lei númeru 46/V(5a) Orsamentu Jerál Estadu (OJE) tinan 2023 ho montante biliaun US$3,16 iha finál globál ho votu a-favór 42, kontra 21 no abstensaun rua (2).
Proposta OJE 2023 ho montante biliaun $3,16 ne’e kompostu hosi orsamentu administrasaun sentrál biliaun US$2,8 (montante ne'e inklui ona Fundu Kombatente Libertasaun Nasionál, biliaun $1), orsamentu seguransa sosiál millaun US$235,7 no RAEOA millaun US$120. (*)
