Tempotimor (Dili)-Prezidente Repúblika (PR), José Ramos Horta hakarak promulga tiha Proporta Lei Orsamentu Jerál Estadu (OJE) tinan 2023, molok tama ba selebrasaun santu natál no tinan foun.
"Ha'u agora hein lai, tanba ha'u husu tiha ona Tribunal Rekursu atu haree aspetu konstituisional, ha'u hakarak iha tempu badak antes de natal promulga", dehan Horta iha sala VIP aeroportu internasional Prezidente Nicolau Lobato, tersa (13/12).
Tanba, hakarak tama iha loron 01 fulan-janeiru tinan 2023, orsamentu buat hotu prontu ona atu governu ezekuta tuir programa sira no labele iha buat ruma failla.
"Purtantu ita tama ona ba iha direita final ba eleisaun foun eh ha'u lakohi halo aktu prezidensial ruma ne'ebe ke depois bele kauza tán, aumenta difikuldade governu ezekuta kna'ar ida kona-bá ekonómia buat sira ne'e mai iha 2023 bele iha rekuperasaun ekonómika di'ak", nia dehan.
Entretantu Parlamentu Nasionál (PN) liuhosi reuniaun plenária, sexta (17/11), aprova proposta lei númeru 46/V(5a) Orsamentu Jerál Estadu (0JE) ba tinan 2023 ho montante biliaun US$3,16 iha finál globál ho votu a-favór 42, kontra 21 no abstensaun rua (2).
Enkuantu, proposta OJE ba tinan 2023 ho montante biliaun US$3,16, ne’ebé kompostu hosi orsamentu administrasaun sentrál biliaun US$2,8 (montante ne'e inklui ona Fundu Kombatente Libertasaun Nasionál, biliaun US$1), orsamentu seguransa sosiál millaun US$235,7 no RAEOA millaun US$120. (*)
