“Buat ne’e bele hetan solusaun, tanba iha tinan sira mai ne’e tenke rezolve ida-ne’e, sela’e lideransa nasionál faillansu, se sub-nutrisaun infantil kontinua ho estatistika hatudu aas tebe-tebes, Timor entre país sira ke pior liu iha mundu ne’e faillansu boot lideransa nasionál”, dehan nia hafoin hala’o vizita kortejia ba Sentru Saúde Komoro, sesta (24/06).
Tanba Timor-Leste nu’udar nasaun ida ne'ebé iha fundu rasik, Governu no lideransa nasionál mak presiza define didi’ak saida mak prioridade ba nasionál, nomós iha aspetu sira mak hanesan morál no etika umanu.
Iha ne'e, Xefe Estadu ko’aia lideransa Nasionál la’ós ba sira ne'ebé dadaun kaer Governu ka Parlamentu Nasionál, maibé mos ba Prezidente Munisípiu sira, administradór postu sira, xefe suku no xefe aldeia sira hothotu tenke kontribui mós ba edukasaun kona-ba nutrisaun.
Durante ne'e laiha buat ida ne’ebé bele importante liu iha sosiedade ida duke kosokoan sira, ki’ikoan sira-nia saúde, inan isin-rua sira-nia saúde ne’e kestaun ida etiku, kestaun morál no kestaun polítiku prematiku tanba sira mak futuru.
Tanba ne'e, hothotu tenke iha konsensu nasionál ida atu haree programa Governu nian, nomós haree Planu Estratéjiku Dezenvolvimentu Nasionál ne’ebé adopta hahú iha 2011 kedas ona, nune’e haree prioridade Governu nian 2023.
Nu’udar Xefe Estadu promete sempre apoia no promove inisiativa hothotu ne’ebé buka atu hadi’a sub-nutrisaun infantil iha Timor-Leste, tanba rai ida-ne’e laiha problema orsamentu, no populasaun millaun 1.3, la’ós boot hanesan nasaun sira seluk. (*)