“Pois, uluk ami iha AMP, ha'u ko'alia iha AMP kuandu hasai KHUNTO hatama fali KHUNTO ne'e señor Xanana, ha'u ko'alia hanesan ne’e la'ós agora atu ba fali CNRT la'e, ha'u ko'alia de'it. Ha’u ko'alia buat ida ne'ebé loos, ha'u ko'alia frankamente ema hothotu rona, CNRT kuandu hasai ha'u-nia ema, hatama fali ha’u-nia ema, mais iha FRETILIN kuandu hasai ha’u-nia ema, hatama fali ninia ema”, dehan Deputada Olinda iha Plenária Parlamentu Nasionál, segunda (20/06).
Tanba iha instituisaun balun kuaze FRETILIN hasai ema ne’ebé hakna’ar-an ba inklui hasai mós ema husi KHUNTO ema hodi hatama fali FRETILIN nia ema.
Tanba ezemplu mak iha SEFOPE mesmu lidera husi KHUNTO, maibé laiha funsaun tanba kna’ar ne'ebé mak iha, hetan limitasaun husi Ministériu Koordenadór Asusntu Ekonomia (MKAE).
“Karreta ida karik ninia mesin ne'e laiha karreta mamuk hela, e ema ida lori karreta ne'e laiha ne'ebé labele temi tan SEFOPE ne'e ha'u lakohi rona tan, tanba SEFOPE nia funsaun laiha”, afirma nia.
Tanba ne'e, kazu joven hadau malu sa’e moru Diresaun Nasionál Empregu Esterior iha Berkora hodi rejistu ba Ezame Lian-Korea la’ós SEFOPE ninia kompeténsia.
Maibé husu Governu atu labele temi tan SEFOPE, tanba SEFOPE karreta ida karik ulun boot sira hasai tiha mesin no agora hamriik mamuk hela.
Maske KHUNTO sente laran moras ba atetude ne'ebé FRETILIN halo ne'e maibé KHUNTO prontu nafatin atu fó apoiu ba Governu to'o mandatu remata.
“Ami, saida mak iha ami nia liman, Administrdór Ainaro de’it, ha’u asegura ne’e asegura to’o hotu maibé buat sira ne'ebé ita-boot sira foti ha’u la hirus ba ida-ne'e, ha’u hanesan Deputada ha’u nia ema sira telefone mai, ha'u hato'o iha ne'e para sira Munisípiu rona”, esplika nia.
Hatan ba kestaun ne'e Xefe Bankada FRETILIN, David Dias Ximenes ‘Mandati’, husu deputada Olinda Guterres atu hatudu faktu kona-ba asuntu ida-ne'e, no temi instituisaun ida ne'ebé mak FRETILIN hasai KHUNTO nia ema.
“Husu esklaresimentu kona-ba FRETILIN hasai ema KHUNTO ninian mak tau fali FRETILIN ninian iha instituisaun ida ne'ebé para ita husu tuir, ne'e ka la'e, ha’u atu husu de’it ida-ne'e”, dehan nia. (*)