“Eh normalmente konvite sira tenke sai antesidensia, e ita nian sai tarde loos, tanba ita mos iha eleisaun, entaun ita nia lista konvite sai tarde loos”, deklara Taur hafoin enkontru ho Prezidente Repúblika, Francisco Guterres ‘Lú Olo’, iha Palásiu Prezidensiál Bairopite, kinta (28/04).
Maibé Governu haruka ona konvite balun ba nasaun sira, la lembra lista konvite sira ne'e maibé haree de'it bainhira konvidadu sira iha disponibilidade atu partisipa mak Estadu preparadu atu simu sira.
“Ida ne'ebé mak mai ita sei simu para partilla alegria ne'e ho ita-nia nasaun ho ita-nia populasaun sira iha ita-nia tomada de pose ne'e”, dehan nia.
Komandante Jerál Polísia Nasionál Timor-Lese (PNTL), Komisiáriu Faustino da Costa hatete, serimonia tomada pose no komemorasaun 20 maiu ne'e, parte komandu PNTL hein hela lista konvidadu husi Komisaun Organizadora sira, oinsá halo preparasaun ba prezensa seguransa nian iha terenu.
“Depois ba oin mak ami sei koordena nafatin katak konfirmada Xefe Estadu sira ne'e hira, hanesan mós Xefe Governu, para nune'e ami bele fó ona orientasaun para prepara ami-nia membru sira”, afirma nia.
Tanba komandu PNTL atu halo preparasaun sei bazeia ba lista Xefe Estadu hira mak Prezidente Repúblika, Francisco Guterres ‘Lú Olo’, no komisaun organizadora sira konvida atubele partisipa eventu rua ne'e. (*)