“Iha kooperativa, la'ós osan mak baze ba kooperativa, maibé membru mak baze ba kooperativa”, dehan Elizário Ferreira, durante vizita membru kooperativa sira iha Suku Tutuluru, Postu Administrativu Same Villa, Munisípiu Manufahe, kinta (29/07).
Tanba ne'e, dirijente kooperativa sira tenke esforau-an serbisu maka’as hodi sensibiliza komunidade sira atubele halo parte iha kooperativa iha nível suku.
“Mobiliza grupu ne'e sai boot liután, e sé bele grupu ne'e halo ki'ik liután. Grupu fahe ba lima ka tolu de'it. Grupu ida na’in-10 ne'e, halo toos oinsá. Ita moris hanesan toos ho natar nia oan, hatene mós halo toos ho natar. Ita tenke hatene oinsá mak atu organiza ida ne'ebé mak di'ak. Grupu sira 10 ne'e di'ak, kuandu fahe malu ba serbisu di'ak”, dehan Elizário.
Iha tempu uluk ema halo de’it to'os komunál, maibé agora ema transforma toos komunál ba serbisu individu, ho benefísiu komun.
“Ne'e katak saida, ita moris iha kooperativísta ne'e, ita-nia kapitál, bens to'os natar sira, investe hotu iha vida kooperativa. Kooperativa jere ita-nia kapitál ne'e, e fó ema seluk ne'e, instituisaun estadu, parte SEKoop, mai atu kompleta ita-boot sira”, hatete nia.
Bainhira membru sira laiha kuñesimentu kona-ba kooperativa, SEKoop sei kontinua fasilita membru sira hodi eleva kapasidade.
“Ita-boot sira halo tiha grupu ne'e sekretáriadu laiha atu halo serbisu, prontu atu halo, maibé atu halo fatin ne'e, rekomendasaun mak ema tenke barak. Tanba ema sira ne'e mak atu serbisu iha fatin ida”, dehan nia.
Iha fatin hanesan, Tezoreiru husi Kooperativa Kréditu Hadomi Jerasaun Futuru (HJF), Armando Bento de Jesus hatete, sira-nia dever kada loron mak informa ba populasaun sira kona-ba oinsá benefísiu husi envolvimentu iha kooperativa, maibé depende ba konsiénsia husi ema ida-idak.
“Ami sempre hala'o ami-nia kna'ar hanesan dirijente ida, mais atu mai tama iha kooperativa ne'e, depende fali ba ema ida-idak”, afirma nia. (*)