“Ha'u kontente tebes, ami foti vasina mai ona, no ha'u bele partisipa iha eventu importante ida ne'e ho ita-boot sira hotu. Liuhusi dedikasaun, vasina ne'ebé la'o, la'o ho di'ak, e atinjimentu di’ak tebes. Ha'u orgullu tebes, e ha’u kontente, tanba ohin ita bele mai hamutuk iha ne'e hodi simu tan vasina astrazeneca husi Austrália. Ita hahú ohin, ho montante totál rihun-atustolu (300 mill)”, dehan Embaixadór Austrália iha TL, Peter Robert, liuhusi diskursu iha serimónia handover vasina AstraZeneca, iha Armajen SAMES Kampun Alor, kuarta (11/08).
Entretantu iha fulan oin sei simu tan vasina doze rihun-atuslima (500 mill) adisionál husi Austrália.
Ministra Saúde (MS), Odete Maria Freitas Belo informa, Timor-Leste simu ona tipu vasina ne'ebé diferente, hanesan vasina AstraZeneca, no Sinovac ho doze hamutuk rihun-577.785.
Durante ne'e, parseiru sira la'ós de'it apoia vasina, maibé mós konsumívius sira hanesan, seringa, algodaun no buat seluk tan ne'ebé uza hodi admite vasina ba iha komunidade sira.
Primeiru Ministru (PM), Tuar Matan Ruak, agradese ba governu Austrália, tanba oferese vasina ho doze rihun atustolu (300 mill).
“Ha'u hakarak, ida ne'e so possível tanba ita-nia Paizes amigu sira, doadór sira, ne'ebé halo esforsu no kontribuisaun hakarak ajuda ita atu atinje ita-nia meta ida ne'e”,
Hafoin simu apoiu vasina husi Governu Austrália, entrega mós vasina AstraZeneca ba Ministériu Asuntu Parlamentár no Komunikasaun Sosial (MAPKOMS), Ministériu Defeza (MD), Ministériu Administrasaun Estatál (MAE), Ministériu Interior (MI), Ministériu Transportes no Komunikasaun (MTK) no Ministériu Saúde (MS), rasik ne'ebé sei ba hala'o kampaña vasina ba populasaun sira iha munisipiu hotu. (*)