Tuir Prezidente Konsellu Administrasaun Timor Gap, António José Loyola de Sousa katak, Timor Gap, E.P. mak sei hamutuk ho kompañia balun hodi fornese konbustivel ba sentral eletrika betanu iha tempu tuir mai.
"Sim, ami ho EDTL diskusaun hela atu haree ba kontratu, depois ami mos halo ezersisiu ona, iha kompañia balun ne'ebé maka sei serbisu ho ami atu fornese mina ba betanu tuir dekretu lei",dehan Nia hafoin sorumutu ho Primeiru Ministru Taur Matan Ruak iha palásiu governu, tersa (23/02/21).
Kompañia ne'ebé sei hamutuk ho Timor Gap, E.P, atu fornese konbustivel ba sentral eletrika betanu husi Singapura, maibé labele fo sai uluk lai naran.
"Kompañia husi singapura, hau labele temi naran, maibé ami tuir prosesu aprovizionamentu ami nian rasik, estandar internasional nakloke, transparante, hotu-hotu tau iha meza leten, tanba ne'e kompañia estadu ita tenki halo negosiu ida transparente no mos kualidade hanesan estadu soberanu",Nia akresenta
Tuir Nia, bainhira asina tiha kontratu, semana tolu mai tan, Timor Gap, E.P. bele fornese ona konbustivel ba sentral eletrika betanu.
"Hein, depois kontratu ami asina tiha, husi ida ne'e semana tolu ba oin ami bele hatama mina mai", dehan Nia
Kona-bá fornesimentu konbustivel ba sentral eletrika Hera, Timor Gap, E.P. la involve iha laran.
"Agora dadauk dekretu ne'ebé sai ona ne'e ami fornese babetanu, Hera ne'e buat seluk ida, ami la involve Hera", Nia afirma
Antes ne'e, mina ne'ebé durante kompañia SACOM fornese ba iha sentru betanu bazeia ba kontratu ASD numeru 013/MOP/2019, ne'ebe ho kuantidade millaun 50.122, 829,67 litrus, ne'ebe nia kontratu asina husi kompania SACOM ho governu.
Kontratu fornese konbustivel ba sentral eletrika betanu antes ne'e, Prezidente Konsellu Administrasaun Kompañia SACOM energia Lda, Abilio da Conceição Abrantes de Araújo mak asina ho governu. (*)