Kandidatu traballadór hamutuk 1.249, kompostu husi mane 925 no feto 324 sei kompete no hadau malu fatin atu ba Austrália.
Diretór SEFOPE Munisípiu Ainaro, João Barros informa prosesu teste durante loron tolu ona joventude sira partisipa ho máximu no prosesu ne'e la'o ho di'ak no transparansia. “Tuir oráriu, teste ne'e sei hotu iha Sexta (18/10/19) semana ne’e.
“Husu ba kandidatu sira ne'ebé tuir teste, maibé la konsege pasa atu labele lakon vontade. Hein oportunidade servisu seluk, ne'ebé sei mai no sira ne'ebé liu ona teste, husu atu nafatin kuidadu saúde ho di'ak,” Barros husu.
Nia dehan, traballadór sira ne'ebé liu teste, naran sei tama ba iha baze de dadus hodi nune’e hein empregadór husi Austrália presiza atu bele ba servisu.
Iha prosesu teste ne'e ekipa tékniku husi Diresaun Nasionál Empregu Exteriór (DNEE) servisu hamutuk ho ekipa tékniku SEFOPE iha Munisípiu Ainaro no mós hetan seguransa maximu husi PNTL Munisípiu Ainaro.