Tuir informasaun ne’ebé asesu husi pájina ofisiál Ministériu Finansas, iha loron tersa (09/05) katak, despeza ne’e halo orsamentu ba mákina Estadu hetok aas tebes no dezvia tiha despesas ne’ebé tuir loloos aloka ba setór produtivu sira hodi dudu kresimentu ekonómiku.
Fasilidade karreta Estadu ne’e mós, em vez de rezulta ba kresimentu iha prestasaun servisus ba públiku ne’ebé aas, maibé infelizmente hatodan fali kapasidade finanseira Estadu nian.
Ho razaun ne’e mak iha fulan-setembru 2021, Governu Konstitusionál daualu lideradu husi Primeiru-Ministru, Taur Matan Ruak introduz polítika foun liuhusi aprovasaun Dekretu-Lei kona-ba subsídiu transporte, hodi transforma kustu operasionál karreta Estadu ba subsídiu transporte.
Tanba ne’e nu’udar meius ida atu hakbi’it kapasidade funsionárius públiku ba despesas transporte; no atu hamenus kustu sosa karreta foun, sosa kombustível no manutensaun.
Aleinde ne’e, atu mellora jestaun veíkulus ne’ebé rigorozu, Governu Konstitusionál Daualu mós aprova ona Resolução do Governo nú. 130/2021 konaba jestaun no realokasaun karreta Estadu ne’ebé regula no kria kondisaun sira atu bele reforsa jestaun ne’ebé efisiénte no rigór liután atu nune’e bele kontribui ba efisiénsia no rasionalizasaun gastus ba Karreta Estadu.
Rezultadu husi opta polítika foun ne’e mak iha tinan 2022, Governu konsege halo poupansa iha despesas públikas besik millaun $2 iha kombustível no manutensaun karreta Estadu, tambá aplikasaun jestaun ne’ebé di’ak ba iha uzu karreta Estadu. (*)