Iha Serimónia lansamentu ne'e MKAE, Joaquim Amaral esplika ba komunidade Lautein katak programa ne'e atu motiva no insentiva grupu agrikultór sira hodi kontinua halo produsaun ne'ebé mak aas ba bebeik.
“Nia objetivu mak ne'e sei motiva no insentiva grupu produtór sira ita-nia agrikultór sira atubele hasa’e sira-nia produsaun no halo boot sira-nia produsaun hodi bele garante merkadu atu ema kontikua sosa hodi sira kontinua funsiona”, dehan nia iha Sentru Asalainu, Suku Fuiluro, Postu Administrativu Losplaos, Munisípiu Lautein, segunda (31/10).
Hafoin implementa programa nasionál ne'e, Agrikultór sira iha Timor-Leste antes ne'e produz nia produtu to'o de'it pursentu 17 maibé implementasaun programa SB produsaun produtu lokál sa'e ba pursentu 40-resin.
Alende ne'e iha mós oportunidade ba kompaña manán na'in sira bele partisipa kontribui iha prosesu Distribuisaun Programa Nasionál Sesta Bázika ne'ebé realiza iha Timor laran tomak.
MKAE nu'udar Koordenadór ne'ebé hallo kna’ar oinsá atu koordena Ministériu relevante sira hanesan Ministériu Turizmu Komérsiu no Industria (MTKI) no Sekretária Estadu Kooperativa (SEKOOP) oinsá fahe hahán Sesta Bázika ba komunidade sira iha territóriu Timor laran tomak.
Alende ne'e, Sekretáriu Estadu Kooperativa (SEKOOP), Elizário Ferreira hatete, sei asegura nafatin merkadu ba produtór sira iha Timor laran tomak.
“Oinsá atu asegura nafatin merkadu ba produtór sira nomós rekuperasaun ekonómika, tanba saida mak presiza Sesta Bázika, primeiru tanba Covid-19, segundu tanba Kalamidade”, dehan nia.
Administradór Munisípiu Lautein, Domingos Savio hatete, ba oin mak sei implementasaun nafatin Programa Nasionál Sesta Bázika husu ba Governu atu fasilita de'it materiál maibé labele distribui hahán ba komunidade sira.
“Se programa hanesan ita simu bebeik ita nia munisípiu Lautein ne'e aban bairua sei implementa desentralizasaun entaun ita-nia rain ne'e labele sustenta Ekonómia ba nia povu, entaun ita husu mak materiál agrikultura, atu hamoris ita-nia povu munisípiu Lautein ne'e”, informa nia.
Tanba iha Munisípiu Lautein ne'e iha rai potensiál ne'ebé mak sei bele halo produsaun ba hahán lokál sira atu labele depende demais ba estranjeiru sira, tanba rai luan ba Agropekuária, peskas no agrikultór no seluk tan.
Lansamentu abertura ba programa nasionál Sesta Bázika ne'ebé realiza iha Munisípiu Lautein ne'e lansamentu ikus iha programa refere. (*)