Tuir informasaun ne’ebé www.tempotimor.com asesu iha pájina MOP, sábadu (02/07) katak, Ministru Obras Públikas (MOP), Abel Pires da Silva, akompaña husi Diretór Jerál Habitasaun no Urbanízmu (DJHU), Eng. Roger Tertuliano Belo, no kompaña Konsultór MGIEL EIPE Unip. Lda, no ITS ITS SAINS TECHNO Unip. Lda, aprezenta rezultadu estudu prelimináriu polu dezenvolvimentu iha munisípiu Baukau no Batugade, iha postu administrativu Balibo, munisípiu Bobonaro ba Primeiru Ministru (PM), Jenerál Taur Matan Ruak, no rezultadu hatudu katak Baukau no Batugade iha poténsia ba kriasaun polu dezenvolvimentu espesiál, no presiza Governu kontinua ba dezeñu detalladu no planu mestri.
“Ami agradese ba Primeiru Ministru, Jenerál Taur Matan Ruak nia tempu fó biban ba ami atu halo aprezentasaun kona-ba rezultadu estudu prelimináriu ba polu dezenvolvimentu iha Batugade no Baukau e estudu ne’e kompletu tiha ona, iha rekomendasaun lubuk ida ne’ebé mak nia rezultadu maioria ne’e konfirma mós ho esforsu ne’ebé agora daudauk Governu hala’o hela, ne’ebé ami kontente tebes ho rezultadu ida-ne’e”, dehan Ministru Abel.
Tanba rezultadu ne’e kona-ba poténsia atu dezenvolve Batugade no Baukau hanesan polu dezenvolvimentu espesiál ho kondisaun lubuk ida atu oinsá Governu ho entidade tomak ne’ebé bele apoiu esforsu ida-ne’e, bele servisu no rekomendasaun ida-ne’e sai rekomendasaun prelimináriu.
“Entaun lori rezultadu ida-ne’e ita sei dezenvolve ou estudu liután kona-ba planu mestri, kona-ba dezeñu detalladu atu halo konstrusaun sira ne’e, sei han tempu oituan maibé importante mak rezultadu ida-ne’e hatudu katak planu ne’e ita bele ezekuta tuir konfirmasaun ne’ebé ita hetan”, esplika nia.
Ba estudu ne’e kompletu tiha ona, no hato’o ba Primeiru Ministru atu fahe kona-ba rezultadu ne’e, agora rezultadu iha ona, bazeia ba ida-ne’e sei dezenvolve kontinuasaun planu mestre, nomós dezenvolve dezeñu detalladu sira.
“Konfirmasaun kona-ba fatin rua ne’e hanesan polu dezenvolvimentu espesiál kona-ba poténsia sira ne’ebé iha mak kona-ba agrikultura, peskas, no seluk tan, rezultadu sira ne’e iha hotu, agora daudauk ita-nia hakarak kontinua halo dezeñu sira ne’e”, katak nia.
Iha aprezentasaun ne'e partisipa husi Diretór Nasionál Urbanízmu (DNU), Manuel da Costa Xavier, Ekípa tékniku sira husi Gabinete Primeiru Ministru inklui ekipa tékniku husi MOP rasik. (*)