Tuir informasaun ne’ebé www.trmpotimor.com asesu iha pájina Palasiu Sinza, domingu (19/06) katak, iha programa ne’e, Ministériu Saúde halo parte ba prosesu dezeñu programa ida-ne'e sai hanesan membru painel asesoria no serbísu hamutuk ho MSSI iha prosesu entrega BdM-JF liuhusi

apoia dezeña programa Bdm-JF, apoia harí’i sistema rejistrasaun iha postu saúde sira.

Nune’e mós apoia organizasaun atu halo vizita domisiliáriu sira, apoia inisiativa sira "cash plus" nian, asegura asesibilidade no fornesimentu livriñu LISIO no estatus defisiénsia ka deklarasaun médika nian no apoia dezeñu kona-ba avaliasaun defisiénsia inkluzivu ida.

Programa ida-ne'e nia benefisiu siknifikativu ba área saúde hanesan parte ida husi haforsa intervensaun nutrisaun espesifiku no promove nutrisaun sensivel liliu ba asesu kobertura inan no oan nia ba atendimentu saúde nian bele di'ak liután hodi haforsa implementsaun programa Saúde na Família nia kobertura sira.

Programa ida-ne'e iha vantajen boot atu hadi'ak saúde ho nutrisaun iha inan isin-rua sira no oan sira ne'ebé iha idade 0-3 anós fazeada to'o 6 anós tuir rekizitu programa nian.

Iha mós fornesimentu pagamentu ne'e hodi hola ai-hán nutritivu hodi hadi'ak dezenvolvimentu bebé iha inan nia kanotak no kresimentu labarik. Tanba Nutrisaun no saúde ne'ebé di'ak iha tempu isin-rua tulun no asegura saúde no nutrisaun ne'ebé di'ak bainhira moris. Saúde no nutrisaun di'ak iha primeira infansia fó vantajen ba dezenvolvimentu fíziku, kakutak no asegura fíziku ne'ebé di'ak liu ba labarik.

Tanba ne’e, presiza tebes atu hadi'a nutrisaun labarik nian iha periodu loron rihun ida dahuluk (1000 dias) hahú kedas iha nian kanotak to'o bebe moris tinan rua, mak tempu ne'ebé oportunu ba istimula kakutak di'ak no asegura futuru ne'ebé di'ak liu ba labarik sira.

Nune’e tau nafatin hanoin katak asesu komunidade liuliu inan isin-rua no labarik ki’ik sira la'ós de'it ba pagamentu subsídiu maibé importante ba hadi'a saúde no nutrisaun, asegura duni sira post-natal.

Ba kontrolu rutina ba konsulta antenatal, imunizasaun, suplementu vitamin sira, detesaun no tratamentu mánutrisaun sedu, tetu fulan-fulan no seluk-seluk tan hanesan output ne'ebé di'ak ne'ebé sei fó impaktu ba nia outcome sira iha futuru iha redusaun labarik tinan 5 mai kraik ne'ebé raes badak, mortalidade no morbidade inan no oan menus, partu iha fasilidade saúde aas.

Programa BdM-JF iha poténsia atu kontribui ba meta balun iha Ministériu Saúde, klaru ke iha esperiénsia potensia kobertura programa nian di'ak.

Taxa mortalidade no morbidade iha inan isin-rua no labarik sei faziadamente tun, prevalensia mánutrisaun iha tendéensia atu reduz, maibé ba faze dahuluk talves sei hasoru dezafiu balun tanba ema sei asesu iha fasilidade saúde barak, pesoál saúde sira firmeza no prontidaun ba responde asistensia saúde.

Iha lansamentu ne'e pesoál saúde iha Sentru Saúde Ainaro Vila hahú halo rejistu ba inan isin-rua no labarik sira ne'ebé mak sai nu’udar benefisiáriu ba Programa ida-ne'e. (*)