Tempotimor (Díli) – Ministru Edukasaun Ensinu Superiór Siénsia no Kultura (MEESSK), Lounginhos Dos Santos hatete, estudante Timoroan ne'ebé hetan bolsu estudu iha estranjeiru hamutuk 5000.
"Estadu oferese bolseiru sira atu kontinua estudu baixerelatu, lisensiatura, maestradu inklui doutoramentu. Estudante iha rai liur ne'e hamutuk rihun lima. Sira iha nasaun ne'ebé mak Timor-Leste hala'o tiha ona parseiru," informa MEESSK iha Ministeriu Finansas, Segunda (09/09/19).
Tuir Lounginhos, bolseiru sira ne'ebé mak estudu iha estranjeiru, sira-nia área estudu mak ida ne'ebé importante ba Timor-Leste.
"Bolseiru sira estuda iha area hanesan, Direitu, Ekonomia, Jestaun, Enjeñaria, Defeza no seluk tan. Ne'ebé mak tuir nesesidade Timor-Leste ninian. Tanba ne'e, ita koloka estudante sira ba área hotu-hotu," nia dehan.
Alende ne'e, MEESSK mós iha ona polítika atu haruka bolseiru área direitu, defeza no ejeñaria ba Portugal, no área seluk ba nasaun sira ne'ebé pertinente. “Kondisaun bolseiru sira iha estranjeiru di'ak hotu. Tanba hetan asistensia husi adidu edukasaun sira,” nia hatete.
Tuir MEESSK nia planu, sei haruka tan adidu edukasaun Timor-Leste nian ba nasaun ualu hodi tau atensaun ba estudante sira mak hanesan iha Portugal, Brazil, Cuba, Filipinas, Tailándia, Indonézia nomos seluk tan ne'ebé sira-nia naran iha ona Ministeriu Edukasaun Ensinu Superior Siensia no Kultura nia gabinete.