Tuir informasaun ne’ebé www.tempotimor.com, asesu iha pajína facebook Gabinete Apoiu Atividade Konjuge Prezidente Repúblika, sesta (25/03) katak, “Cidália hetan konvite husi Amazon Watch Magazine no aprezenta nia kandidatura iha novembru 2021 no tuir entrevista online hodi kompete ba prémiu. Hafoin liu prosesu entrevista, Cidália sai kandidatu selesionadu númeru 9 husi país 50 ne’ebé partisipa no sai aprezentadora iha eventu ida ne’e”.
Antes ne'e, Espoza Prezidente Repúblika, sai husi Timor-Leste ba Dubai, iha loron 20 fulan-marsu hodi ba tuir The 9th South America-Africa-Middle-Asia Women Summit (SAMEAWS) no selesionadu entre kandidatu sira seluk atu manán Amazon Watch Magazine’s Blue Ribbon Award & annual Global Women Leaders Hall of Fame (GWLHOF).
Ba SAMEAWS ne’e halibur hamutuk feto emininente no iha influénsia ho parseiru sira husi rejiaun Amerika Sul, Afrika, Mediu Oriente no Asia ho enfaze ba sira-nia papel krítiku iha futuru ba dezenvolvimentu ekonomia, modelu papel feto eminente ne’ebé diretamente kontribui ba dezenvolvimentu hodi luta hasoru dezigualdade ne’ebé feto hasoru atu hetan mudansa tuir sira-nia hakarak.
The 9th South America-Africa-Middle-Asia Women Summit hala’o iha Dubai, Uni Emirat Arab, iha 25 marsu 2022. Partisipante ba SAMEAWS mak líder feto husi nasaun oinin, iha Governu, akademista, investigadór, emprezária, ativista no líder feto senior sira seluk iha mundu.
Nu’udar Espoza Prezidente Repúblika, Cidália komprometidu atu hasa’e oportunidade ba asesu servisu sosiál iha área edukasaun, saúde reprodutiva, protesaun labarik, eradikasaun moras hadaet no haforsa ekonomia feto.
Cidália partisipa ativa iha Organização Popular da Mulher Timor (OPMT) hodi promove emansipasaun feto. Iha 2011, eleitu nu’udar Sekretária ba Komisaun Nasionál Juridisaun no releitu filafali iha 2016-2021 nu’udar Sekretária ba Komisaun Nasionál Fiskál. (*)