“Tinan ida ne'e ita-nia reprezentante Timor-Leste nia partisipasaun hamutuk atleta 38, kompostu husi modalidade atletizmu, taekwondo, boxing, natasaun, karatedo, hit besi, no fotubol rasik”, informa Abrão bainhira halo Seremónia Despedida ba Kontinjente Atletas no Ofisiál sira ne’ebé sei Vietname, iha Palásiu Governu, kinta, (05/05).
Ba atleta agora 25 ne'ebé iha ona Vietname liliu modalidade Fotebol nian, tanba sira iha jogu ne'ebé mak preparasaun iha rai liur.
Dadaun ne’e iha atleta ne’ebé sei husi Timor-Leste atu tuir tan hamutuk 13 mak atu sai hamutuk ho ofisiál no trinadór sira iha Vietname.
“Atletas sira ne'ebé agora sai dadauk ne'e, selesionadu husi kampionatu nasionál ho liga nasionál mak selesiona ba mellór sira ne'ebé mak ita halo iha ita-nia rai laran mak selesiona sira no prepara sira atu ba kompete duni, para nune'e kompete ho dignidade atu reprezenta ita hotu nia orgullu”, dehan nia.
Primeiru Ministru (PM), Taur Matan Ruak, husu obrigadu ba Sekretáriu Estadu Juventude no Despostu, tékniku no treinadór sira, tanba bele ona treinu joven sira no suporta ona sira hodi bele ba tuir SEA GAMES, no reprezenta Timor-Leste iha Vietname.
“Ha'u sente kontente tebes, bainhira rona dehan ita kompete iha SEA GAMES, ita-boot sira hatene ita ukun-an tinan 20 ona, entaun ha'u hanoin tempu ona para ita atu kompete, naturalmente kompetisaun ida ne'e kuandu ita dehan kompete ne'e siknifika, treinu no investimentu, treinu investimentu no kualidade ne'e importante los, entaun ha'u kontente tanba halo selesaun no sai di'ak liu entre di'ak liu, nune'e bele tuir kompetisaun iha ASEAN Games iha Vietname”, dehan Taur.
Tanba ne’e, husu ba atleta Timoroan ne'ebé ba kompete Jogus Sudeste Aziátiku nian, atu konsentrasaun ba iha kompetisaun.
“Uluk ha'u sei prezidente, sira balun ba kompete lakon, no ha’u husu sira-nia treinadór, nusa sira lakon, e sira hatan mai ha'u katak, sira kalan halai lakon ba hader fali, entaun dader tama kampu estamina la di'ak, nune'e husu imi labele ba haree fali malae sira-nia andar. Andar imi ba fa’an matan fali, haluha tiha toba”, dehan PM Taur.
Maibé, rona treinadór sira, no responsável sira ne'ebé akompaña, no hothotu hakarak iha susesu, tanba susesu ne’ebé hetan ba nasaun tomak.
“Ha'u espera imi iha dezempeñu di'ak, ha'u fiar imi reprezenta Timor-Leste ho di'ak liu, ha'u reza ba imi, no ita-nia matebian sira tulun nafatin imi, la'ós de'it iha viajen maibé mós durante jogu sira, to’o imi filafali ho isin di'ak no susesu”, afirma Taur. (*)