Sekretáriu Estadu Juventude no Desportu (SEJD), Abrão Saldanha 'Nokosiku hatete, akordu ne’ebé asina ho Embaixador Xina, Xiao Jianguo, atubele apoiu hodi reabilita kampu Futebol iha lesidere ba selebrasaun amizade Xina ho Timor-Leste durante ne’e.
“Ohin Sekretáriu Estadu Juventude no Desportu (SEJD) asina akordu ho nota entendementu ida, kona-ba reabilitasaun kampu futebool iha Lesidere, ne'e doasaun ida husi povu no Governu Xina mai ita joven sira iha Timor-Leste hodi komemora ba aniversáriu Xina ho Timor-Leste “, dehan Sekretariu Estadu Abrão Nokosiku iha salaun SEJD Lecidere Dili, kuata (30/03).
Iha Ambitu Komemorasaun ne'e sira doasaun ho osan montante rihun $300 atu reabilita kampu futebool Lesidere, iha tinan 2022.
“Akordu ida ne'e bele kontinua kedas ba prosesu konstrusaun no sira-nia target ne'e antes 20 maiu hotu, nune'e uza ba selebrasaun kooperasaun Timor-Leste ho Xina”, esplika nia.
Ba kampu ne'e nia espasu ne’ebé ki'I sei muda fali ba sintetika nune'e joven sira bele uza ho di'ak.
Iha akordu ne’e, kompaña internasionál Shangai Coorporations Group Ltd, mak sei reabilita kampu Lesidere, ne'ebé durante ne'e abandona hela. Nune’e Kompaña sei halo konstrusaun tuir nia tempu hafoin bele entrega ba Govemu Timor-Leste. (*)