“Sira be kona pozitivu ne'e mai hosi hotu Dili, sira Baucauoan duni maibé natoon serka sanitária avizu iha loron 09 marsu 00:00 oras komesa ne'e, loron 8 sira barak mak halai mai depois iha-ne'e (Baucau) mak kona fali, sira-ne'e mak lori mai iha-ne'e, ne'ebé tuir ha’u-nia haree. Ha’u la’ós ema tékniku, buat ne'ebé transmisaun lokál seidauk iha (Baucau) buat ne'e importa hosi Dili mai,” dehan Olívio ba www.tempotimor.com liuhusi telemóvel, segunda (15/03).
Olívio hatutan relasiona ho praparasaun prevensaun COVID-19, parte autoridade hamutuk ho FALINTIL-FDTL, PNTL, ekipa saúde kuaze kada loron halo kampaña kona-bá fase liman beibeik ho sabaun, distansiamentu sosiál no uza maskára.
Nune’e mós komunidade sira-ne'ebé nia família hosi Dili tenke aprezenta-aan atu halo teste antes halibur iha komunidade.
“Família ruma ne'ebé mai hodi Dili tenke informa mos ba tékniku bele hasai sira-nia sampel para teste, labele subar fali hosi sira-nia família, ida-ne'e mak ami ko’alia ba públiku, la hatene halo tuir ga lae ne'e konsiénsia fali ema idak-idak nian,” dehan Olívio.
Entertantu implementasaun serka sanitária ba Munisípiu Baucau rasik sei aplika hahú ohin no sei remata iha 29 marsu 2021, enkuantu desizaun ne'e governu foti bazeia ba númeru kazu pozitivu COVID-19 iha Munisípiu Baucau ne'ebé aumenta pozitivu na’in-6.(*)