Prezidente Autoridade Munisípiu Baucau, Olívio Freitas "Boulessa", prontu ezeukta orden hosi governu sentrál atu implementa serka sanitária no konfinamentu obrigatoriuiha Munisípiu refere.
Maske nune'e, Prezidente Autoridade Munisípiu Baucau ne’e seidauk simu karta ofisiál ruma relasiona ho desizaun governu sentrál kona-bá implentasaun serka sanitária no konfinamentu obrigatóriu ne'ebé ohin fó-sai ona liuhosi reuniaun Konsellu Ministru iha salaun Ministériu finansa (MF), Aitarak-laran Dili.
“Orientasain hosi nasionál mak mai, ami iha-ne’e sujeita, kumpri orden sira-ne'ebé mai, karik ida-ne'e mak sente katak ba Baucau nia di’ak, ami tenke halo duni, ami la’o-tuir," dehan Olívio ba www.tempotimor.com liuhosi telemóvel, segunda (15/03).
Olívio akresenta, daudaun ne'e Autoridade Munisípiu Baucau rasik instala ona Salaun Krize Munisipál Baucau (SKMB) ne'ebé kompostu hosi FALINTIL-FDTL, PNTL, pesoál saúde, admistrasaun munisípiu Baucau hodi halo sosializasaun ba komunidade sira iha fatin públiku hanesan merkadu hodi aviza uza maskára, distansiamentu sosiál no fase liman beibeik ho sabaun.
Olívio haktuir, Ministériu Saúde ohin transporta ona mákina teste sampel ne'ebé daudaun ne'e tau iha Hospital Regional Referál Eduardo Ximenes Baucau (ORREXB) ne'ebé tuir planu utiliza ba iha munisípiu Baucau no Lautem.
Relasiona ba limitasaun transporte, Olívio rasik apela ona ba diretór hotuhotu iha munisípiu Baucau atu para karreta iha SKMB nian hodi atende ba nesesidade urjénsia relasiona ho operasaun COVID-19.
“Ami laiha apoiu ruma hosi nasionÁl, seidauk, rekursu saida mak iha ami-nia liman, ami organiza ida-ne'e, FALINTIL-FDTL, PNTL, Diretór hotuhotu, ami iha ne'e kontribui halo ida-ne'e,” dehan Olívio.
Entertantu implentasaun serka sanitaria ba munisípiu Baucau rasik sei aplika hahú ohin no sei remata iha 29 marsu 2021, enkuantu desizaun ne'e governu foti bazeia ba númeru kazu pozitivu Covid-19 iha Munisípiu Bauacau ne'ebé aumenta pozitivu na’in-6.
Kona-ba medida implementasaun serka sanitaria ne’e kuaze hanesan ho Dili ne'ebé bandu sidadaun sira iha Baucau atu halo movimentu bainhira laiha nesesidade urjénsia no autoriza de’it ba atividade negósiu ne'ebé relasiona ho hahaan bázika, inklui bandu komunidade sira atu hakat liu area jurídika munisípiu Baucau nian bainhira la’ós urjénsia.(*)