“Ate agora diretiva seidauk simu atu apoiu asegura seguransa, mais ha'u hanoin seguransa ne'e PNTL mak halo, barak liu sira mak tenke halo, porque ne'e seguransa, ne'e lei mak define, forsa la'ós lalin tun sa'e ba halo fali seguransa lori kilat ba tiru fali populasaun”, dehan Tenente Jenerál Falur hafoin hasoru malu ho PR Lú Olo iha Palasíu Presidensiál Bairopite, kuarta (16/02).
Antes ne'e, Komadante Jerál Polisía Nasionál Timor-Leste (PNTL), Komisáriu Faustino da Costa deklara, Instituisaun PNTL garantia seguransa ba eleisaun Prezidensiál tinan 2022 sei la'ó ho di'ak.
“PNTL ne'e Instituisaun Estadu, ne'ebé qualquer atividade ita sempre asegura, tanba servisu rutina polisía nian mak atu garante katak eleisaun iha tinan ne'e la'ó di'ak, no seguransa ba kampaña nasionál mós la'o di'ak e klaru Polisía Nasionál Timor-Leste servisu ba ida ne'e”, dehan Komisariu Faustino, iha Komando Jerál, Kaikoli, sesta(07/01).
Nu'udar PNTL nia obrigasaun, hala'o servisu tuir lei, orden no tuir Konstitusaun PNTL nian atu garantia estabilidade iha rai laran. (*)