"Ita iha fulan-Outubru nia laran ne'e, Polísia Tránzitu Nasionál rejista asidente tráfegu, hamutuk 137, ema mate laiha, maibé iha na’in-hitu (7) mak kanek todan no restu kanek kmaan”, dehan Superintendente Xefe João Belo dos Reis, iha Komandu Jerál PNTL, Kaikolis, segunda (08/11).

Ba operasaun tuir sirkulár ne’ebé mak PNTL hasai iha mídia sosiál nomós iha mídia eletrónika sira, kona-ba kooperasaun ba entidade hothotu, atubele deteta movimentu sirkulasaun transporte Estadu nian.

Tuir dekretu lei númeru 08/2003, kona-bá uzu transporte Governu nian ka estadu nian iha ámbitu loron feriadu ba finadu nia husi loron 1-2 fulan-novembru.

"Ekipa Konjunta kompostu husi Komisaun Anti Korrupsaun (KAK), Provedoria Direitu Umanu no Justisa (PDHJ), Komisaun Funsaun Públika (KFP), Polísia Nasionál Timor-Leste (PNTL), Patrimóniu Estadu iha Ministériu Finansas ho Inspetór Jerál Estadu (IKE) deteta no halo apreensaun ba karreta Estadu hamutuk sia (9) iha ámbitu loron feriadu ba finadu nian husi loron 01 to’o loron 02 fulan-Novembru”, informa nia.

Durante prosesu verifikasaun, deteta katak karreta Estadu nian haat  (4) ne'ebé hetan autorizasaun husi dirijente ka fatin ne’ebé mak sira servisu ba, no karreta lima (5) seluk laiha autorizasaun.

"Karreta lima laiha autorizasaun ne’e, agora ami deteta hotu ona, ami enkamiña filafali ba Patrimóniu Estadu atu deteta loloos, karreta ne’e pertense ba sé, ministériu ne’ebé, depois enkamiña mós ba KAK atu bele verifika, karik mosu irregularidade ruma iha ne’eba, ka kontra lei ruma iha ne’ebá, hola parte iha korrupsaun ruma karik, KAK mak sei halo verifikasaun”, esplika nia. (*)