“FONGTIL husu ba Sua Excellencia Primeiru Ministru atu foti asaun ruma (xamada) ba membru governu kompotente (SEJD) atu nune’e atividade refere labele akontese tan iha tempu tuir mai”, dehan nia iha kna’ar fatin Kaikoli, kinta (15/07).
Tanba, akontesementu ne’ebó fó sai husi mídia nasionál iha loron (13/07) katak, Tentara Nasional Indonesia (TNI) kaptura sidadaun timoroan na'in-salunu-resin-ha’at (14) tanba tama ilegalmente ba nasaun Indonézia hodi ba sa’e sintu.
Ho ida ne’e, governu presiza tau atensaun ba akordu entre governu Timor-Leste ho líder máximu organizasaun Persaudaraan Setia Hati Terate (PSHT) Indonézia, tanba tuir akordu ne'e sei la simu tan membru PSHT husi Timor-Leste ne’ebé ba sa'e sintu ilegál iha Indonézia.
Husu mós ba Lideransa Nasionál atu tau ba asaun/prátika kona-ba kompromisu politíka eleitorál iha tempu kampaña.
Tanba, iha kampaña 2017-2018 bainhira manán iha eleisaun no kaer ukun sei re-ativa fali atividade Arte-Marsiál, maibé realidade la akontese.
“Realidade ida ne'e hanesan retotika de’it, hanesan estratejia polítika ida hodi manán votu. Ikus mai joven ne’ebé hakarak envolve-an iha Arte-Marsiál tenki sai vítima”, afirma nia.
Rekomenda mós ba autoridade siguransa iha fronteira atu fó atensaun máximu no toma medida rigorozu ba movimentu ilegál sira atubele asegura povu Timor-Leste husi surtu Covid-19 foun ho vasinate Delta. (*)