Euclides ne'ebé durante asume kna'ar nu'udár Segundu komandante iha komandu Munisípiu Dili, promovidu iha loron kinta (01/07) hodi lidera UPF  nian iha fronteira.

Ho mudansa ba pozisaun foun ne'e, Komandante Euclides hatete, kna'ar ne'ebé simu, la'ós prezente ida husi komandu, maibé sai responsábilidade boot durante hala'o misaun.

"Purtantu, ohin ha'u simu tomada de posse, ne'e la'ós prémiu fó ba ha'u, maibé responsábilidade ne'ebé mak fó ba ha'u. Ne'ebé ha'u sei lori responsábilidade ida ne'e hodi bele garante seguransa sira iha liña fronteira”, dehan Euclides da Costa Belo, hafoin simu posse, Kaikoli, kinta (01/07).

Durante hala'o misaun iha liña fronteira, promete sei servisu hamutuk ho autoridade lokál sira, líder relijioza sira, komandu PNTL Munisípiu Covalima, Bobonaru, no Likisá inklui mós parseiru sira husi parte nasaun viziñu nian hanesan Tentara Nasional Indonézia (TNI) ho Polísia Repúblika Indonézia (POLRI).

Komandante Jerál PNTL, Komisáriu Polísia, Faustino da Costa esplika, nomeiasaun ne'e nu'udár kultura ida iha instuisaun PNTL nia laran hodi halo mudansa ba superior sira oinsá bele hetan esperiénsia foun iha ambiente seluk ne'ebé lahanesan.

"Nomeiasaun ne'ebé fó, transferensia ne'ebé iha, ita-boot sira parte ida ba solusaun ba problema instituisaun ninian. Komandu fó fiar ba ita-boot sira hodi hala'o servisu kna'ar, ho responsábilidade, ita-boot sira komandu akompaña katak ita-boot sira iha duni esperiénsia ne'ebé bele tau, utiliza hodi implementa kna'ar polísia nian hodi proteze ita emar sira nomós ita-nia rikuson tomak, liliu iha sitiasaun pandemia, asegura ita-nia nasaun ho populasaun husi pandemia surtu covid-19 ninian”, hatete Komisáriu Faustino.

Haree ba nomeisaun ida ne'e bazeia ba despaixu husi komandu jerál nian ho númeru 235/CG-PNTL/VI/2021, hodi nomeia Superintendente Polísia, Euclides da Costa Belo hodi asume pozisaun hanesan Komandante ba Unidade Patrullamentu Fronteiras (UPF), hodi substitui Superintendente Polísia, Joăo Sancho Pires, ba asume fali kna'ar foun nu'udár segundu komandante iha Munisípiu Dili nian. (*)