Tempotimor (Díli) - Vítima José Gomes hetan hana husi ema deskoñesidu iha área Merkadu Komoro, iha loron kinta (01/04), kuaze oras tuku 20:00 otl, ho Rama Ambon.

Vítima José ho idade rua nuku-resin-ida (21) orijen mai husi Postu Administrativu Atsabe, Munisípiu Ermera no hela iha área Komoro, hetan hana husi ema deskonñesidu ho Rama Ambon.

Bainhira sira tula modu ho karreta husi diresaun Kampung Baru ba Merkadu Komoro, hafoin ema deskoñesidu hana Jose no vendedora ne’ebé sira tula nia sasán ne’e konsege dada vítima tama iha Merkadu laran hodi ses husi suspeitu sira.

Maske Jose hetan hana, maibé nia parte la hatene ema ne’ebé halo asaun krime hasoru nia.

“Hana ne’e ha’u mós la hetan, ha’u hatun modo hotu ha’u ba loke odamatan atu sae karreta, sorti bin ne’e bolu ha’u fihir ba mak kona ha’u-nia kotuk ne’e lae kona ha’u-nia kakorok”, esplika nia iha HNGV, kinta (01/04.

Vítima ne’e konta tuir, sira tula ema ne’ebé aluga karreta hodi tula modo ba fa’an, iha oras tuku 7 iha área Tasitolu no liuhusi Kampung Baru hafoin mai hatun sasán, mak ema deskoñesidu sira husi Merkadu Komoro hana-nia.

“Hatun modo hotu ha’u loke odamatan atu sae ba karreta mak bin ne’e bolu ha’u fihir mak rama kona los ha’u-nia kotuk, ha’u sente hanesan ema lori ai mak baku”, hatete nia.

Hafoin ema deskoñesidu hana vítima ne’e halai tama ba Merkadu laran hodi dada sai Rama Ambon ne’ebé belit hela iha isin maibe metin nafatin.

Hafoin akontesimentu, Polisia Nasional Timor-Leste, halo kedan patrolla hafoin lori bele vítima ba Sentru Saúde Kampung Baru no kontinua evakua ba Ospital Nasional Guido Valadares (HNGV) iha sala Emerjénsia kuaze iha oras tuku 20:45 otl, hodi halo tratamentu.

Maske notísia ne’e tun, maibé www.tempotimor.com seidauk halo konfirmasaun ho parte komAndu PNTL nian. (*)