Komandante PNTL munisípiu Dili, Superintendente Xefi, Henrique da Costa informa, enkontru ne'ebé sira realiza ho objetivu atu halo avaliasaun ba servisu operasional koordenada, ne'ebé sira hala'o durante iha fulan Novembru 2020 no Janeiru 2021 nian.
Nia dehan, liuhusi enkontru avaliasaun mak bele haree fallansu saida maka hetan, problema saida mak enfrenta, no oinsá bele hadi'a di'ak liu tan iha futuru.
"Ita nota katak, durante ita halo servisu ne'e, ita nia membru sira hetan obstákulu barak liu-liu iha parte transporte nian ne'ebé ho kondisaun ladi'ak, no halo atendimentu sira nian tarde iha terrenu", Superintendente Xefi, Henrique da Costa nu'udár Komandante PNTL munisípiu Dili, hateten iha Kaikoli, Sesta (15/01).
Henrique hateten, kuaze metade ka maioria husi transporte hirak ne'e, nia kondisaun la di'ak, tanba hanesan públiku akompaña katak, iha fulan novembru to'o dezembru 2020 to'o oras ne'e, reparasaun ba iha veikulu paradu.
"So hanesan iha manutensaun ki'ik-oan sira ne'ebé maka komandu iha spare part, entaun sira bele ajuda. Ida ne'e mak sai hanesan obstakulu, maibé espera ke ba oin ida ne'e bele hadi'a, atu nune'e ita nia ema bele halo servisu ho di'ak", nia tenik.
Nia hatutan, tanba sira iha ekipa ne'ebé ho kuantidade boot no barak, nune'e bainhira sira to'o iha terrenu, mezmu balun tarde, maibé sira balun ne'ebé to'o uluk, halo sira bele responde situasaun saida de'it maka akontese iha terrenu.
Maski sira hasoru problema iha transporte, maibé intermu rekursu umanu, sira sufisiente tanba sira haree husi unidade espesial, UPF, UPM, Kuartel jerál, sentru formasaun, sira hotu nia ekipamentu sufisiente atu fó apoiu ba iha komandu munisípiu Dili iha servisu operasional.
"Intermus-de-ekipamentus ho sira seluk, ita haree tantu ba iha ita nia ekipamentu pesoal ba oin ita bele kompleta ita nia membru sira ho fasilidade sira hanesan ne'e, para atu nune'e sira bele hala'o sira nia servisu di'ak liu tán", nia esplika.
Nia mós apresia ho servisu husi ekipa komando jerál, UEP UPF, UPM, Sentru Formasaun Polísia sira, tanba bele apoia komandu munisípiu Dili hodi halo servisu operasional ba garante Dili sai fatin seguru ba ema hotu iha periudu Natál ho tinan foun ninian.(*)
