Komandante Unidade Polísia Militar (PM) Maijór Infantária Abel da Costa Xavier (Niki) hateten, la'ós instituisaun F-FDTL mak hasai membru ne'e, maibé nia mak deside rasik.
"Ohin la'ós ami mak duni sai ami-nia membru husi instituisaun F-FDTL liu-liu iha unidade PM nian, maibé nia rasik mak husu rejigna-aan deside nia vida ba sivíl, la'ós nia halo sala ka kontra estadu mak hasai, maibé nia mak husu, entaun Xefe Estadu Maiór Jenerál F-FDTL Maijór Jenerál Lere Anan Timur halo despaixu," Komandante Niki hateten iha edifísiu PM Kintal-Boot, Sesta (11/12).
Nia mós dehan, segundu sarjentu ne'e nia dedikasaun ba F-FDTL di'ak tebes, tanba nia mós hola parte iha fundadór ba Falintíl FDTL nu'udar mós Falintíl ida ne'ebé luta ba liberta patria Timor-Leste nian.
"Ha'u-nia sarjentu ne'e nia dedikasaun di'ak tebes, ha'u lakohi para husik nia, mais nia rasik mak hili, ha'u labele kaer nia, tanba ita ema ne'e moris la hanesan, depois ha'u-nia sarjentu ne'e la'ós foin mak mai hodi aproveita de'it, maibé nia mós fundadór ida ba F-FDTL ne'e," nia dehan.
Komandante ne'e mós dehan, eis segundu sarjentu ne'e nia apa saudozu "Sai La Fila" mós mate ba rai ida ne'e.
"Ita hotu hatene, saudozu "Sai La Fila" adjuntu iha ai-laran, mate ba rai ida ne'e, nia oan rasik mak ida ne'e (Manekas) entaun nia mós fundadór Falintíl, la'ós foin mak mai," Niki esplika.
Komandante ne'e afirma, ohin nia sai, sei ba vida polítika, tanba informasaun ne'ebé iha katak, nia hanesan vise prezidente partidu Os Verdes de Timor.
Iha fatin hanesan eis segundu sarjentu infantaria Manuel João Baptista (Manekas) mós rekoñese katak, bainhira sai husi Militar sei fila ba polítika.
"Sim, ha'u hanesan vise Prezidente Partidu Os Verdes de Timor ne'ebé foin hamriik, entaun atu kompleta ba nasaun demokrásia nian, maka ha'u deside rejigna-aan husi F-FDTL, la'ós komandu F-FDTL mak hasai ha'u, maibé ne'e ha'u-nia inisiativa rasik," Manekas dehan .
Entretantu eis segundu sarjentu infantaria Manuel João Baptista serví instituisaun F-FDTL komesa husi funu to'o ohin, Depois serví iha unidade PM iha 2007 to'o ohin nia rejigna-aan.
Alende ne'e membru PM sira ne'ebé durante ne'e ativu hamutuk 158, maibé ohin eis segundu sarjentu infantaria Manuel João Baptista (Manekas) deside rejigna-aan, entaun hela membru ativu hamutuk 157.(*)