“Ha’u dehan ona ba oin ita sei koloka Unidade Polísia Militar mak halo servisu iha postu foun Manduki ne'e, tanba forsa nasionál sira barak mak agora servisu iha liña fronteira iha futuru sei destaka tan membru F-FDTL iha área Damelaran, Tunubili, Tilomar, Mota Masin, Postu Levo no Bobonaru, entaun ita tenke tau PM iha ne'e para kontrola membru halo servisu tama sai iha liña Fronteira ne'e tenke servisu ho disiplina garante paz estabilidade no dame ba nasaun no povu”, dehan  Falur, hafoin remata Inaugura Postu Foun F-FDTL iha Manduki, Atabae.

Tuir informasaun ne’ebé www.tempotimor.com asesu iha loron tersa (21/06) katak, razaun koloka Polísia Militar iha postu foun Manduki, tanba forsa armada barak dadaun ne'e halo misaun servisu iha liña fronteira presiza Polísia Militar tenke kontrola membru F-FDTL atu labele mosu problema ho komunidade.

Bainhira koloka forsa armada iha fronteira tenke tane no respeita populasaun labele akontese problema, nune'e buat ruma akontese povu mak sai liman kroat ba forsa armada, tanba ne’e husu ba militar sira servisu iha fronteira tenke disiplina servisu hamutuk ho komunidade.

“Imi mai halo servisu iha fronteira hau lakohi rona imi halo problema ho komunidade sira, tanba iha ameasa moderna ruma ita militar maske iha kilat no bomba ho tanque da gurra, maibé ema bele halo harahun iha minute balun, tanba ita la presiza forsa boot ita-nia forsa mak povu ita hamutuk ho sira ema ida sei la harahun ita”, afirma nia.

Maske koloka Polísia Militar iha fronteira atu halo servisu los hodi kontrola membru, maibé la’ós kontrola fali sasán sira tama no sai iha fronteira ne’e, tanba ne’e servisu Polísia Nasionál Timor-Leste nian kompeténsia atu halo servisu ne’e hamutuk ho autoridade sira seluk ne’e tau iha liña fronteira.

“Ha’u sei koloka Polísia Militar iha fronteira, maibé bandu labele la’o tun sa’e atu kontrola fali sasán sira ne’ebé tama sai iha liña fronteira, tanba ne’e iha fatin ida-ne’e, ha’u ho imi labele ko’alia kona-ba seguransa, tanba seguransa lei mak hatete ne’e polísia mak halo servisu ita F-FDTL la halo”, deklara nia.

F-FDTL halo seguransa tenke tuir dalan, iha fronteira misaun miliatr sei halo iha fronteitra komandu F-FDTL sei define klaru militar nia servisu ne’e hodi labele tan akontese militar halo intervesaun ba servisu polísia nian.

“Ha’u sei define klaru ita-nia misaun iha fronteira, ha’u lakohi rona ita halo intervensaun ba servisu polísia nia, maibé iha situasaun ruma polísia husu mak ita apoiu, maibé tenke tuir dalan legál ruma ida-ne’e mak ha’u ko'alia ba oin tenke rona mak komandu labele rona fali orientasaun husi politiku”, hatete Falur.

Entretantu postu F-FDTL foun ne’ebé hetan ona inugurasaun husi Komandu F-FDTL ba oin sei koloka Unidade Polísia Militar mak sei halo servisu iha postu refere hodi kontrola membru F-FDTL halo servisu iha fronteira.

Ba edifisiu foun Postu F-FDTL iha Manduki, Postu Administrative Atabae, Munisípiu Bobobaru hahú konstrui iha loron 03 marsu 2017 no finaliza iha loron 31 marsu 2022 no orsamentu hamutuk $225.312 17,8, hodi selu inidimisaun ba komunidade sira ne’ebé hetan afetadu ba prosesu kontrusaun.

Tanba sasán ba kontrusaun edifísiu Postu foun ba F-FDTL ne'e fornese husi komapaña Vitoria, halo husi forsa enjeñaria rasik, halo durante tinan lima mak remata, tanba difikuldade ba prosesu akizasaun materiál sasán sira inklui surtu COVID-19 durante tinan ida ho balun labele halo servisu. (*)