Tuir informasaun ne’ebé www.tempotimor.com asesu iha pájina Relação Informação Publica F-FDTL, segunda (04/07) katak, membru sira ne’e atu fó protesaun ba ema ne’ebé ho pozisaun boot no kualidade hanesan Prezidente Repúblika no Primeiru Ministru husi rai seluk bainhira halo vizita mai Timor-Leste.

Membru sira ne’e, partisipa másimu iha formasaun durante tempu semana rua, hahú husi loron 20 fulan-Juñu to’o loron 01 fulan-Jullu ne’e no konklui ona sira-nia formasaun iha Kuartél Unidade Polísia Militár (PM) Kintál-Boot, Dili.

Durante formasaun ne’e, membru sira hetan matéria lubun ida hanesan, organizasaun ba servisu seguransa nian no oinsá protesaun ba autoridade sira, módulu báziku, kápsula ba seguransa nian, eskolla ba itineráriu, atentadu, verdura, ekipamentu avansada, ekipa fiksa, diresaun evaziva, no  módulu kona-ba tiru nian.

Komandante Interinu Unidade Polísia Militár (PM), Capitão Francisco Xavier dos Reis Neto esplika, papél ka misaun Polísia Militár nian, la’ós de’it sai defesa ba soberania nasionál, maibé misaun ida seluk mak foka kona-ba seguransa ba autoridade sira.

“Tanba ne’e mak, iha segundu estájiu ida-ne’e, ninia objetivu ne’e mak atu espesializa ba membru sira para hala’o misaun karik, bele la’o tuir doutrina ne’ebé mak sira aprende”, dehan Capitão Francisco.

Tanba objetivu ida tán husi formasaun ne’e mak bele sai hanesan padraun seguransa ida ba membru sira hotu iha instituisaun F-FDTL.

Maske formandu na’in-15 ne’e la’ós membru husi PM nian, maibé parte komandu buka esforsu buka hodi fasilita formasaun seguransa ba membru sira hotu iha nível ne’ebé mak hanesan.

Reprezentante Xefe Estadu Maiór Jenerál F-FDTL, Xefe Gabinete no Koordenadór Konjuntu Estadu Maiór, Capitão e Fragata João da Silva, agradese bá Polísia Militár tanba bele dezeña ona planu hodi prepara kursu ida-ne’e bá membru F-FDTL sira.

Kursu ne’ebé espesifika kona-ba seguransa ba ema sira ho alta entidade, konsidera hanesan treinu ida profisionál, ba preparasaun bázika ba militár sira, soldadu sira, no sarjentu sira, atubele koñese báziku oinsá mak bele la’o hamutuk ho superior no autoridade sira.

Tanba ne’e, apresia ho inisiativa sira mak mai husi unidade PM nian, tanba formasaun kona-ba seguransa ba alta entidade ne’e, hala’o ona ba faze daruak, ka segunda estájiu.

Maske formasaun ne’e ho de’it tempu ne’ebé badak, tuir nia, iha benefísiu boot, tanba ne’e, husu membru sira atu utiliza ida-ne’e nu’udár buka’e, hodi prátika iha servisu fatin.

Membru F-FDTL sira ne’ebé tuir formasaun ne’e, maioria mane, mai husi Komponente Navál, Centro Formação e Treino (CFT) Nicolau Lobato Metinaro, Unidade FALINTIL, ne’ebé treina husi instrutór Timoroan Polísia Militár no Brazileiru nian iha Timor-Leste. (*)