Portavoz Komando Jeral PNTL Superintendente Arnaldo Araujo informa, PNTL kaptura membru KORK hirak ne’e tanba sira hala’o atividade treinamentu hodi hasa’e sabuk.

"Loos duni iha dia 15 de Jullu, PNTL munsipiu Manufahi halo kapturasaun ba ema hamutuk na’in 66, ne’ebé mak envolve hela treinamentu atu sa’e sabuk," dehan Arnaldo ba jornalísta sira iha Kuartel Jerál PNTL, Kaikoli, Kinta (16/07).

Membru KORK na’in 66 ne’ebé PNTL kaptura kompostu husi mane na’in 64 no feto na’in 2, no entre sira na’in 17 mak kategoria idade kiik.

"Agora dadaun, ema nain 66 ne'e submete hela ba prosesu investigasaun iha PNTL Manufahi," nia informa.

Kona-ba atuasuan PNTL ne’e tuir lei ka lae, portavoz ne’e dehan, hafoin simu informasaun PNTL Manufahi halo kedas kapturasaun, tanba karik iha buat balun ne’ebé la tuir regras.

Iha kapturasaun ne’e, nia hatete, PNTL Manufahi konsege halo aprensaun ba sasan sira hanesan sintu (sabuk) no farda organizasaun nian.