Tanba, viola Lei númeru 5/2017, pratika Arma Branka ne'ebé defini iha artigu 2 númeru 1 ko’alia kona-bá katana, espada no rama ambon.
Tuir Informasaun ne'ebé www.tempotimor.com asesu iha pájina servisu relasaun públika (09/12) katak, PNTL halo kapturasaun ba joven hirak ne’e iha kinta parte kalan, oras tuku 11:50, tanba iha tendensia atu ataka malu entre joven no iha fatin akontesementu ekipa asegura mos sasan kroat sira hanesan Katana (tipu samurai-1), maubeka naruk-1, tudik-2, besi kanu-1, tizoura tesi besi-1, besi beton 12 mili-1, vizka-3 ho kedas besi beton ne’ebe tesi badak ona inklui fatuk hodi lansa iha pasta ida nia laran.
Tuir deklarasaun husi reprezentante Grupu Arte Marsiais PSHT, ne'ebe hetan kapturasaun katak, nia kuñese di’ak suspeitu na’in-10 ne’ebe hamutuk ho joven balu mai husi bairo seluk tuda uma no sira ne’e husi organizasaun Arte Ritual 77 ne’ebe akontese kalan-kalan, hahú kedas iha loron segunda to agora no kazu ne’e, sira informa ona suspeitu sira nia naran ba PNTL Esquadra Kristu Rei no ohin kalan kontinua tuda tan fali sira, tanba ne'e sira sai ho sasan kroat.
Relasiona ho Armas Brancas ne’ebe sira lori, sira prepara de’it atu salva-aan karik Grupu 77 sira ba ataka iha sira nia bairo laran, nune'e sira iha biban halo atake hasoru.
Nune’e, ekipa PNTL asegura kedas joven hirak ne’e ho sasan kroat lori ba Esquadra PNTL Kristu Rei hodi halo prosesu identifikasaun no kontinua halo auto entrega ba Servisu Investigasaun Kriminal Nasional hodi asegura iha Komandu PNTL Munisípiu Dili no halo detensaun durante 12h no sei kontinua halo prosesu investigasaun. (*)