Login to your account

Username *
Password *
Remember Me

Kalan Tolu, PNTL Prende Motorizada 160 Karreta Ida

Sesaun Polísia Tránzitu Munisípiu Dili halo atividade operasaun pasa revista prende motorizada hamutuk 160. Sesaun Polísia Tránzitu Munisípiu Dili halo atividade operasaun pasa revista prende motorizada hamutuk 160. Foto Suplay

Tempotimor (Dili)-Komandu Polísia Nasionál Timor-Leste (PNTL) liuhusi Sesaun Polísia Tránzitu Munisípiu Dili halo atividade operasaun pasa revista ba transporta ne'ebé sirkula iha tempu kalan konsege prende motorizada hamutuk 160 ho karreta privadu iha área juridiku Munisípiu Dili durante kalan tolu.

Xefe Sesaun Polísia Tránzitu Munisípiu Dili, Inspetór Domingos Sarmento Gama hatete, durante kalan tolu hahú iha loron 15 to’o 17 fulan-agustu prende motorizada hamutuk 160 ho karreta ida iha munisípiu Dili hanesan iha área Kolmera prende Motorizada 53, Kristo Rei iha motorizada 45 ho karreta ida no iha área Elemloi prende motorizada 62, tanba sira komete violasaun ba lei kódigu estrada.

“Evidénsia motorizada hamutuk 160 ho karreta ida-ne’e ita prende iha Dili, tanba sidadaun sira barak mak la monta sapa matrikula no tula malu la uza kapasete ida-ne’e mak ita halo aprensaun aplika koima ba sira atu kumpri regra lei kódigu estrada”, dehan Domingos, iha kna’ar fatin PNTL Kaikoli, kinta (18/08).

Motorizada sira ne’e barak mak laiha sapa matrikula no tula malu la uza kapasete, tanba ne’e PNTL halo operasaun pasa revista maka’as liu ba laiha sapa matrikula ho la uza kapasete hodi evita krime no asidente fatal iha estrada públiku.

“Kazu balun akontese sidadaun balun uza motorizada laiha sapa matrikula na’ok ema nia sasán no uza arma branka atu hakotu ema seluk nia vida, tanba ne’e iha halo operasaun foku ba ida-ne’e no la uza kapasete atu evita krime no asdente fatal iha estrada”, esplika nia.

Tanba ne’e loron boot hahú iha 20 Agostu too 30 Agostu PNTL nafatin halo operasaun iha tempu kalan no loron atu garante nafatin seguransa atu implementa lei no ordem ba sidadaun hotu tenke kumpri.

“Ha’u husu ba ita-nia sidadaun sira katak tau imi-nia konsénsia karik imi-nia motorizada sapa matrikula laiha ka monu lakon bele mai trata iha ami-nia fatin Komandu Munisípiu Dili ba sira ne'ebé dokumentu lakon ne'e gratuita no bele ba DNTT hodi hetan sapa matrikula foun, maibé rona la halo tuir ami sei la tolera sidadaun ne’ebé gosta kontra odem públiku”, afirma nia.

Ba atividade operasaun pasa revista ba transporte PNTL sei foku ba motorizada sira ne’ebé la uza sapa matrikula iha tempu kalan sirkula iha Dili laran, tanba iha grupu organizadu agora dadaun iha Dili la’o maka’as hadau ema nia sasán lori rama ambon hodi hana ema.

“Sidadaun ne’e motorizada ita prende sei aplika koima ba sira ho másimu hotu laiha mínimu, tanba tinan 19 ona lei kódigu estrada ne’e estadu produz ita halo sosializasaun dala barak ona sidadaun sira komprende hela, maibé sira mak gosta viola ita prende aplika multa ho másimu hotu”, hatete nia.

Antes nee durante loron (6), iha fulan-agostu, Polísia Nasionál Timor-Leste (PNTL), husi Sesaun Polísia Tránzitu Munisípiu Dili, prende motorizada hamutuk 273, kontra lei kódigu estrada iha área juridiku Munisípiu Dili.

Komandante operasaun PNTL Munisipiu Dili, Inspetor Xefe Delfim da Silva hatete, atividade operasaun pasa revista ba transporte karreta ho motorizada no la’o ain tama sai bairu iha área juridiku Munisípiu Dili iha loron (6), nia laran konsege prende motorizada 273 mak kontra lei kódigu estrada.

“Ita iha semana kotuk iha loron neen (6), hahú iha 08 to’o 13 Agostu konsege prende motorizada hamutuk 273 mak kontrola lei kódigu estrada iha área juridiku Munisípiu Dili nian”, dehan nia.

Motorizada sira ne’ebé mak PNTL prende ne’e iha 150 mak dadaun ne’e kumpri ona dever hodi selu koima iha banku ho osan hamutuk $7.787 ba iha kofre estadu no sira ne’ebé mak seidauk kumpri selu koima.

“Husi motorizada sira ne’e iha 150 mak kumpri ona selu koima hodi mai foti fali ona sira-nia evidénsia motorizada iha Dili, maibé sira seluk seidauk ne’e ita sei asegura nafatin evidénsia sira ne’e, bainhira sira selu hotu ona entrega ona billete ne’e mak ita mak foin entrega fali motorizada”, afirma nia. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« March 2024 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks

Online Counter