“Horikalan iha oras tuku 1 kalan ami-nia membru UPF halo operasaun la’o ain no prende karreta tipu vaskolante ida ho xapa matrikula A. 53.588 no detein joven mane nain-1 ho inisial OdC, tinan 37 husi Salele-Uetaba, Suku Beiseuk, Postu Tilomar ne’ebé hatama kombustivel ilegál hanesan Gazolina 35litru masa 40, Gazoel 35 litru masa 31, totál 2480 litru (2ton+)”, dehan Komandante UPF, Euclides Belo, liuhusi telefone, kinta (04/08).
Daudaun ne’e suspeitu ho evidénsia UPF entrega ona ba Servisu Investigasaun Kriminál Komandu PNTL Covalima hodi halo prosesu investigasaun.
Aleinde ne'e, iha loron 02 fulan-agustu, UPF halo aprensaun mós ba ró bero ida transporte gazolina masa 35litru hamutuk masa 11 iha área Batugade.
“Atu informa mós katak iha loron tersa tuku 9 kalan ekipa servisu sekreta UPF Mota-Ain halo aprensaun ba ró bero ida transporta gazolina masa 35itru hamutuk masa 11 iha tasi ibun Batugade, agora evidénsia aguarda iha komandu UPF no sei halo prosesu hodi entrega ba Komandu Munisipiu Bobonaro”, informa nia. (*)
