Tempotimor (Tutuluru)- Eis-Primeiru Ministru (2007-2015), Kay Rala Xanana Gusmão, ba komunidade sira iha Aldeia, Tutuluru, Postu Same Vila Munisípiu Manufahi informa katak, sira na'in rua avo Ramos Horta ‘penanguran’ (dezempregu).

Lider karismatiku ne'e dehan, “hau ho Eis-Prezidente Republika José Ramos Horta agora dezempregu, tanba ne’e la'o tun sa'e de'it laiha servisu.”

"Ami rua Avo Ramos ‘penanguran’ hanesan imi, ne'ebé ita hanesan de'it", dehan Xanana ho hamnasa hafoin halo asaun karitativa iha suku Tutuluru Postu Same Vila Munisípiu Manufahi, kuarta (23/09).

Xanana reitera, tan laiha servisu, nune'e Soe netik tempu ituan la'o haleu timor atu halo asaun karitativa ba povu kbit laek sira, difisiente no kampaña regras prevensaun ba komunidade hotu-hotu.

Tempotimor (Manufahi)-Tuir lider nasionál Kay Rala Xanana Gusmão, liberdade ne’ebé Timor-Leste hetan la’os liu husi duni inimigu ho kilat maibé duni ho vontade povu nian ne’ebé hili ukun rasik an liu husi konsulta popular, no negosiasaun ne’ebé frente diplomatika sira halo.

Tempotimor (Manufahi)-Komunidade sira iha Daurata, Suku Fahi-Nehan, Postu Administrativu Fatuberlihu, Munisípiu Manufahi ho lia dadolin hatete lider nasional na’in rua, Kay Rala Xanana Gusmão ho José Ramos Horta mak hali huun boot ba povu ki'ak.

Timoroan Ba Servisu iha Koreia no Austrália Inisia Husi Horta

Tempotimor (Manufahi)- Eis Prezidente Repúblika ba períodu 2007-2012, José Ramos Horta, maka inisia Timoroan ba servisu iha Correia no Austrália hodi fó kontribuisaun ba hasa'e ekonomia Timor-Leste nian.

Laureadu Nobel ba Paz, José Ramos Horta halo esplikasaun ne'e, atu halo komparasaun entre Timor-Leste ho nasaun sira seluk iha mudansa dezenvolvimentu liuliu iha área ekonomia.

"Rai ida iha Cabo Verde naran Mindelo, uluk mós kolónia portugés no rai ne'e laiha mina, osan mean, rai ne'e maran loos. Kada tinan udan fulan ida de'it, maibé konforme estudu internasionál sira halo entaun rai Cabo Verde ne'e sira-nia jestaun ekonomia finanseira di'ak liu iha Áfrika tomak", dehan nia, iha Postu Turiskai, Munisípiu Manufahi, Kuarta (23/09).

Eis-Ministru Negósiu Estranjeiru no Kooperasaun ne'e mós hatutan, klaru sira-nia populasaun lubuk iha iha Amérika hanesan mós timoroan balun agora iha Inglaterra, Koreia no Austrália hodi fó kontribuisaun ba dezenvolvimentu ekonomia.

"Uluk ha’u kuandu Ministru Estranjeiru, ha’u mak ko'alia primeira-vez ho Koreia iha 2002 no 2003 kedas, favór loke imi nia odamatan merkadu ba joven Timor ba servisu iha ne'ebá", dehan Horta.

Lider nasionál ne'e akresenta, iha momentu ko'alia ho nasaun Koreia fo razaun tolu ba sira.

"Ida ami nia ekonomia ka osan laiha liu no família sira ki'ak liu, imi simu ami-nia ema para pelumenus osan ruma tama. Segundu ha’u, ami nia joven sira ba servisu iha Koreia sira sei manan esperiénsia servisu étika no dixiplina servisu nian tanba Koreia ne'e servisu duni la'ós halimar. Terseiru hametin relasaun di'ak liután Timor ho Koreia. No lori tinan 3 no 4 mak programa ne'e komesa hahú", hateten nia.

Horta subliña, grupu primeiru ba Koreia ne'e nia rasik mak ba despedida sira iha aeroportu, maizumenus sira na'in 50 no to’o agora rihun 2 resin mak ba tan.

"Austrália mós hanesan ha'u ko'alia primeiru, maibé difisil liu, primeiru grupu ba na'in 16, sira ba aprende peska, agora ba barak ona kuaze rihun rua, hanesan mós rai seluk, iha Inglaterra barak kuaze 30 Mill", tenik Horta. (*)

Tempotimor (Dili) - Mosu situasaun krize oioin iha Timor-Leste maibé povu sei la mesak, tanba lider nasionál sira nafatin hamaluk ho sira.

Eis-Prezidente Repúblika (2007-2012), José Ramos Horta hateten, iha tempu povu susar sei la mesak, tanba realidade mak Eis-Prezidente Repúblika (2002=2007) no Eis-Primeiru Ministru 2007-2015), Kay Rala Xanana Gusmão, hatudu ona liuhusi asaun karidade kuaze fulan hirak nia-laran.

"Maun boot Xanana hahú ona fulan hirak nia-laran, hahú primeiru ho problema boot ho inundasaun iha Dili fulan-Marsu ne'e mak maun boot hahú servisu umanitária, karidade ba populasaun tomak ", Horta hateten, iha ninia diskursu, hafoin vizita suku Grotu, Tersa (22/09).

Laureadu Nobel da Paz ne’e informa ba populasaun suku Grotu katak, bainhira iha situasaun krize lider sira sei la husik povu mesak ho terus.

"Ami mai hamutuk ho povu atu hatete, imi la mesak, lider sira la haluha iha tempu krize no susar mak lider sira tenke hatudu kbiit no fuan hodi hakbesik no hametin povu", dehan Horta

Nune'e, ho situasaun sira hanesan Covid-19 mak lider nasionál na'in rua, Kay Rala Xanana Gusmão ho José Ramos Horta hakbesik aan nafatin ba populasaun sira. (*)

Tempotimor (Manufahi) - Eis-Prezidente Republika (2002-2007) no Eis-Primeiru Ministru (IV Governu Konstitusional 2007-2012) Kay Rala Xanana Gusmão ho Eis-Prezidente Republika José Ramos Horta mak hanesan abut no talin ba nasaun Timor-leste (TL).

Tuir Sefe Suku Filomeno do Santos ne'ebé hanesan reprezenta ba komunidade suku Grotu konsidera Lider karismatiku Kay Rala Xanana Gusmão mak abut no Eis-prezidente Republika José Ramos mak talin ba nasaun.

"Abut ba rai timor mak aman Xanana no talin mak aman Ramos Horta",dehan Sefe suku Grotu, iha ninia introdusaun badak iha Suku Grotu, tersa (22/09).

Tuir nia, Lider karismatiku Kay Rala Xanana Gusmão mak abut ba nasaun, tanba luta iha rai laran hodi defende Timor-leste, no Laureadu novel da paz José Ramos Horta mak talin ba Timor-Leste, tanba luta iha rai liur hodi defende nasaun.

"Aman abut no talin mai iha suku Grotu mak hau respeitu", tenik Nia

Nune'e, Aman abut Kay Rala Xanana Gusmão no talin José Ramos Horta ba Timor-leste mak bele komprende hatene kondisaun no situasaun iha suku Grotu Postu Same Vila Munisípiu Manufahi.