Tuir Ajenda ne'ebé mak fó sai iha pájina Prezidensia Konsellu Ministru katak, sei diskute deliberasaun ida kona-ba nomeisaun no Ezonerasaun ba Chefe Estadu Maior Jenerál Forsas Armadas no Vise Xefe Estadu Maior Jenerál Forsas Armadas iha Xefe do Estado-Maior das Forças Armadas (CEMFA).

Antes ne'e, Ministru Defeza (MD), Filomeno Paixão deklara, diskusaun ba karta reforma husi Xefe Estadu Maior Jeneral FALINTIL-Forsa Defeza Timor-Leste (F-FDTL), Tenente Jeneral Lere Anan Timur iha Konsellu Ministru (KM) adia ba loron sesta (21/01) lokraik tanba Primeiru Ministru (PM),Taur Matan Ruak la prezensa.

"Karta reforma lere nia ne'e ohin seidauk deside iha Konsellu Ministru (KM) ,hein deside hotu mak fo sai,no ita muda fali ba sesta (21/01) lokraik tuku haat tanba karta ne'e submete ona maibé ohin adia ba fali Sesta loraik mak ko'alia”, dehan Paixão.

Proposta hirak ne'e hotu ba ona Primeiru Ministru, hein atu diskute maibé adia ba fali sesta tanba Primeiru Ministru rasik la prezensa

"Orseik ami hasoru malu ona, ko'alia hotu ona, surat sira ne'e ohin hatama hotu ona ba KM maibé seidauk iha desizaun husi konsellu Ministru, ne'ebé ita hein iha sesta loraik”, hakuir nia.

Entretantu karta reforma husi Xefe Estadu Maior Jeneral FALINTIL-Forsa Defeza Timor-Leste (F-FDTL), Tenente Jenerál Lere Anan Timur, Ministeriu Defeza simu iha loron segunda (17/01/2022). (*)