Tempotimor (Dili) – Primeiru Ministru (PM) Taur Matan Ruak ho Prezidente Interinu Rejiaun Administrativa Espesial Oé-Cusse Ambeno (RAEOA) no Zona Espesial Ekonomia Sosiál Merkadu (ZEESM), Arsenio Paixão Bano, rezolve tiha ona problema ne'ebé ekipa tranzisaun hasoru iha Oé-Cusse.
"Laiha buat ida. Tanba foin lalais señor prezidente interinu mai hasoru ha'u. Ami rezolve hotu problema. Agora la'o di'ak loos," dehan PM Taur Matan Ruak iha Palásiu Prezidensiál Bairro-pite, Kinta (08/08/2019).
Ekipa tranzisaun ne'ebé PM haruka ba halo avaliasaun ba projeitu hotu iha RAEOA no ZEESM, to'o iha Oé-Cusse iha loron 30 Jullu 2019 liubá.
Tenke Jestór Di'ak
Entretantu, Diretór Ezekutivu Forum ONG Timor-Leste (FONGTIL), Daniel Carmo dos Santos espera, lideransa ida ne'ebé atu lidera Rejiaun Administrativa Espesial Oé-Cusse Ambeno (RAEOA) no Zona Espesial Ekonomia Sosiál Merkadu (ZEESM) tenke iha matenek jestaun nian.
"Ita presiza ema ne'ebé iha kapasidade jestaun ne'e to'o ona. Nia atu polítika ka la polítika ne'e la'os ita nia kestaun. Tanba, ita la han no hemu polítika. Kestaun mak ema ne'ebé hatene jestaun," hatete Daniel Carmo dos Santos bainhira remata sorumutu ho Prezidente Repúblika iha Palásiu Prezidensiál Bairro-pite, Kinta (08/08/2019).
Tuir Daniel, sosiedade sivil preokupa mak sustentabilidade husi projeitu ZEESM ne'e. Tanba, nia dehan, estadu gasta tiha osan lubuk ida.