Hafoin finaliza kontazen votu, Prezidente Parlamentu Nasionál (PN), Aniceto Longuinhos Guiterres Lopez deklara, pedidu konfirmasaun ne'e, aprova ho votu afavor 34 kontra 0 no absteinsaun 18.

“Nune'e votu konfirmasaun ba deklarasaun Estadu Emerjénsia pasa e aprovadu”, deklara Aniceto iha plenária PN, tersa (10/8).

Maibé, Xefe Bankada KHUNTO, Olinda Guterres husu membru Polísia Nasionál Timor-Leste (PNTL) no Falintil-Forsa Defeza Timor-Lestte (F-FDTL) atu matan moris iha iha fronteira terestre, tasi no aero.

Tanba ne’e, Ministru Defeza no Vise Ministru Interior tenke alerta maka’as ba membru hotu iha fronteira atu kontrola maka’as fronteira, tanba atividade ilegál la’o nafatin.

“Señor Ministru Defeza no Señor vise Ministru Interior fó hatene ba ita-boot sira-nia elementu sira ne'ebé mak iha fronteira matan moris neon nain, tanba ne'e ita-boot na’in-rua nia konta”, hatete nia.

Ho vírus foun corona-delta ne'ebé dadauk tama ona mai iha Timor-Leste, ema hotu m’os tauk, husu ba Governu atubele haruka tan militar no polísia balun ba reforsa seguransa iha fronteira. (*)