Kay Rala Xanana Gusmão iha sede AMP, Sesta (16/03). Foto Julio Goncalves
DILI – Prezidente Aliansa Mudansa ba Progresu (AMP), Kay Rala Xanana Gusmão katak sei manan eleisaun antisipada ne’ebé sei akontese iha loron 12 Maio tinan ida ne’e, tanba durante ne’e sira halo ona prepasaun di’ak.
Xanana hatutan, prosesu partidu politika tolu, CNRT, PLP no KHUNTO hamutuk nu’udar prosesu historiku ida desde tinan 2002 to’o ohin loron. Ne’e signifika, situasaun politika atual iha Timor – Leste persija resposta foun hosi partidu politika sira ho sira nia lider.
“Agora sira nain rua (PLP, KHUNTO) mai tan, se la manan, ne’e dehan terlalu. Ami mak ne’e, fiar aan la’o ba oin,” hatete Xanana liuhosi konferensia imprensa hafoin anunsia lista kandidatura AMP nian iha sede AMP, Bairo Grilos, Dili, Sesta (16/03).
“Ida ne’e dalan di’ak ida hodi reprezenta povu nia hanoin no serve povu di’ak liutan,” hatutan Xanana.
Nia hatutan, preparasaun AMP nian la’os foin mak mosu no akontese, maibé pratikamente AMP nia lalatak hatudu tiha ona durante fulan ne’en (6) iha Parlamentu Nasionál.
“Agora AMP kompara hanesan bebé karik kompletu ona, falta de’it tau nehan hodi tata malu, maibé la’ós atu tata ema,” esplika Xanana.
Xanana promete katak, bainhira povu fó konfiansa ba AMP hodi manan eleisaun ne’e, sira sei halo esforsu hodi serve povu di’ak liutan.
“Bainhira fó fiar, ami sei la sama ruin no ran, sei servi ho laran tomak, sei hakilar malu haka’as aan hodi servi povu,” Xanana promete.
Lista kandidatura AMP nian asina hosi lider partidu tolu hanesan, Kay Rala Xanana Gusmão, Taur Matan Ruak no Nai Mori. Lista ne’e sei aprezenta ba Tribunal Rekursu iha tempu badak.
Entretantu, durante ne’e mós partidu FRETILIN ho fiar metin katak FRETILIN sei manan boot liutan iha eleisaun antisipada ne’e. (Oki)