Ministru Prezidánsia Konsellu Ministru, Fidélis Manuel Leite Magalhães, hatete, KM ko’alia oinsa ezije ba Funsionáriu Públiku hanesan ajente estadu ne’ebé presiza kontribui no sai ezemplu ba sidadaun hotu.
“Konsellu Ministru mós ohin ko'alia mós kona-ba oinsá ita ezije liután funsionáriu públiku sira atu sai ezemplu iha esforsu nasionál vasinasaun atubele hetan Vasina no hafoin hetan Vasina mak ba servisu fatin”, dehan Ministru Fidelis iha Ministériu Finansas, kuarta (09/06).
Maibé Ministériu Saúde mós presiza esforsu nafatin hodi aselera rítmu vasinasaun ba sidadaun atinje rihun lima kada loron.
“Governu mós ohin ba saúde atu halo esforsu maka'as para bele mantein nafatin rítmu ida ho 5.000 kada loron ida, tanba iha Munisípiu Díli de'it ita hatene. Agora ne'e sei foku iha Munisípiu Díli tanba taxa infesaun iha Dili maka’as liu”, dehan nia
Tanba iha faze dahuluk, entre loron 7 no 28 fulan-abril, vasina ba ema hamutuk 28.412, iha faze daruak entre loron 10 no 28 fulan-maiu, totál ema hamutuk 48.170 mak simu ona doze dahuluk. Hahú kedas iha loron 31 fulan-maiu to'o loron 8 fulan-Juñu, fó ona 16.943 doze.
Nune’e mós iha loron 10 fulan-maiu to’o loron 5 fulan-Juñu, iha média, ema rihuntolu mak simu vasina lorloron.
Tuir planu vasinasaun iha Munisípiu Díli, sei kontinua fó doze dahuluk ba populasaun ne'ebé seidauk simu vasina Sinovac no AstraZaneca. (*)