Sekretáriu Estadu Komunikasaun Sosiál (SEKOMS) Juvinal Mericio ‘Akara’ deklara, estrada husi Vikeké liga ba Lautein, governu liuhusi Ministériu Obras Públika (MOP) deside preve ona iha planu tinan 2022.

“Ha’u hakarak transmite informasaun direta, katak estrada husi Vikeké ba postu Uatukarbau, no postu Iliomar to'o Lospalos tama ona iha planu 2022”, dehan nia iha plenária PN, segunda (31/05).

Maibé, estrada husi munisípiu Baukau ba Vikeké dadaun ne'e konstrusaun la'o hela.

Ho ida ne'e, governu sei halo aprezentasaun prosesu ida ne'e ba Parlamentu Nasionál atu deputadu sira akompaña.

Enkuantu, Deputadu bankada Partidu Demokrátiku (PD), Mariano ‘Asanami’ Sabino, husu governu atu klarifika prosesu estrada ida ne'e, tanba povu presiza  hatene.

“Kona-ba estrada nasionál husi Baukau no Vikeké ba Uatulari no Uatukarbau, uluk dehan ita aloka ona osan, ne'ebé ita hakarak serteza ona, bainhira hahú, e se mak agora kaer la'o hela, para povu ne'e bele hatene”, hatete nia.

Tanba projetu ne'ebé sei realiza husi Baukau ba Vikeké ne'e hanesan nasionál, maibé husi Vikeké ba Uatulari no Uatukarbau sei liga to'o iha Iliomar ne'e rejionál.

“Ne'ebé ida ne'e agora dadauk la'o ho osan ida ne'ebé, e la'o tiha ona ka lae”, hatete nia. (*)