Tanba ne’e, kooperativa tenke eziste nafatin atubele fó atendimentu ba membru sira. Maibé governu sente apresia ho komunidade ne’ebé komesa koñese kooperativa.

Governu liuhusi SEKoop, iha ninia papél oinsá mak atu asegura ninia sustentábilidade institusional, no estabilidade finanseira ho estabilidade ekonómika.

“kooperativa ne'e hari'i tiha, labele mate fali, tenke nafatin moris atubele atende ninia membru sira. Ida ne'e mak sai hanesan papél importante parte sekretária estadu kooperativa nian atu asegura dezenvolvimentu kooperativa iha Timor-Leste", dehan Elizário iha Salaun Joăo Paulo II, sesta (30/04).

Prezidente kooperativa AIP, Rui Castro hatete, atividade asembleia jerál ne'e, kontinuasaun husi Movimentu Asaun Ekonómiku Komunitária (MAEKOM), ne’ebé hari’i iha tinan 2018, hodi organiza komunidade hakiak na'in iha fatin hothotu.

Tanba, iha tinan 2019, realiza ona lansamentu ida kona-ba promosaun no diversifikasaun produtu lokál liuhusi hakiak na'in sira.

Dadaun ne’e, hakiak na'in sira organiza malu ba asembleia ida ne'e atu hari'i kooperativa ida ho naran Agro-Industry Pioneer, ne'ebé mai husi hakiak na'in sira.

“Ami-nia fokus atu fó fasilidade ba nia membru sira atu bele haboot sira-nia Business”, dehan Rui.

Bainhira ema ida hahú ho atus-ida (100), maibé iha kapasidade atu halo ba rihun-lima (5000), sé asesu finanseiru formál ba banku sira seluk seidauk, bele hahú iha ho empresta iha kooperativa AIP hodi hala’o atividade negósiu.(*)