Xefi departamentu Ditalmologia, Belmerio Jerónimo hatete, iha lista ba operasaun matan ne'e, durante loron rua hamutuk na'in 20-resin, maibé serka sánitaria, entaun adia ba loron seluk.
"Tuir loloos horseik ho hodibairua ita iha lista operasaun, na'in 20 hanesan ne'e, maibé ita kansela hotu, tanba ho situasaun hanesan ne'e ita labele halo operasaun, entaun adia ba loron seluk bainhira situasaun normál ona, ita halo operasaun", dehan nia iha knaar fatin HNGV, kinta (11/03/21).
Ho situasaun ne'e, prezudika duni ba pasiente sira ne'ebé presiza atu halo operasaun ba matan, maibé labele hala'o tanba, situasaun serka sánitaria.
Maski, nune'e maibé, bainhira pasiente sira ne'ebé presiza emerjensia halo operasaun bá matan, parte sira prontu atende.
"Sira ne'ebé mak mai ho emerjensia, presiza tebes atu halo operasaun, ne'e ita halo operasaun", nia relata
Serka Sánitaria iha Munisípiu Dili durante la'o ona loron rua ne'e, pasiente matan ba sentru matan menus tebes.
"Loron rua nia laran ne'e, loron ida maximu pasiente 20 de'it, maibé ohin hetok menus liu tán, dader foin pasiente na'in 5 hanesan ne'e mak mai konsulta, kuandu loron normál ne'e pasiente bele to'o 100, maibé ho situasaun hanesan ne'e pasiente menus liu", dehan nia. (*)
