Iha Governasaun Dahitu, Ministériu Negosiu Estranjeiru no Kooperasaun, nomeia ona embaixadór na’in 5 ba nasaun sira hanesan Amrika, Nova Zelandia, Mozambique, Brasil ho Portugal, maibé hafoin iha mudansa governasaun, Governu foun ne’ebé lidera husi Primeiru Ministru Taur Matan Ruak, aprezenta fila fali lista foun ba embaixadór ninian ba Prezidente Repúblika Francisco Guterres Lu Olo. Iha Lista foun ne'e mosu mudanca naran embaixador ba Portugal ho Mozambique ne'ebe antes ne'e nomeia on a husi Prezidente da Republika.
Maske prosesu ne’e nu’udar prosesu normal ida, maibé mosu preokupasaun ba kredensial ne’ebé kandidatu embaixadór na’in tolu kaer ona, tanba deskonfia embaixadór sira ne’e mak haruka rasik karta Agree mon (Surat aceitasaun) ba embaixada husi nasaun ne’ebé sira atu haknar an ba.
Ba kestaun ne’e, Ministru Negosiu Estranjeiru VIII Governu Konstitusional, Dionisio Babo rekoñese katak iha kandidatu embaixadór na’in 3 mak kaer ona kredensial.
Maske la esplika prosesu kandidatu embaixadór ne’e hetan kredensial, maibé Babo hatete de’it, prosesu atu koloka embaixadór sira sei hein konkordansia husi Prezidente Repúblika.
Ba prosesu nomeiasaun embaixadór ne’ebé VIII Governu hala’o, Ministru Babo dehan, MNEK aprezenta lista ba Konsellu Ministru hafoin hetan apoiu, Primeiru Ministru sei lori ba Prezidente Repúblika hodi bele konsidera.
“Se la sala purvolta 15 pesoas mak ita propoin ona ba Prezidente (Repúblika) atu konsidera, na’in 15 seidauk iha lei atu simu pose, so na’in tolu mak hetan agreement ona husi nasaun residente,” dehan Ministru Babo.
Normalmente, nia dehan, bainhira mosu governu foun bele halo mudansa ba embaixadór ka lista kandidatu embaixadór, maibé tenke konsulta nafatin ho PR.
“Ne’ebé haruka tiha ba señor Prezidente (Repúblika). Señor Prezidente sei konsidera hela, ita hein hela. Kuandu konkorda ona bele iha mudansa,” dehan nia.
Hafoin PR konkorda no hetan aprovasaun, MNEK sei haruka karta ba nasaun sira ne’ebé sei haruka embaixadór ba hafoin hetan konkordansia husi nasaun hirak ne’e foin bele fó pose.
“Sira ne’ebé hetan ona agreement bele ba ona, ba sira ne’ebé seidauk hetan agreement, agreement ne’e hanesan aseitasaun husi nasaun ida simu, ne’e mak ita hein fulan ida, fulan rua, fulan tolu, haruka agreement mak sira foin ba.”
“Ne’ebé iha faze lubuk ida. Governu hato’o, señor Prezidente konsidera. Se konkorda ona, ita haruka ba nasaun ida ne’ebé simu ne’e, nasaun ida simu ne’e konkorda ona haruka fali mai depois mak ita halo tomada posse,” nia esplika.
Prezidente da Republika antes ne'e nomeia on a embaixadores nain lima ba nasaun sira hanesan Portugal, Estadu unidus da Amerika, Brasil, Mozambique ho Nova Zelandia maibe iha posibilidade governu troka naran rua maka Prezidente da Republika nomeia on a atu sai embaixador ba Portugal ho Mozambique ninian.
Iha parte seluk Estudante ida husi departamentu Relasoeins internasionais iha Universidade Nasional Timor Leste hateten lolo'os VIII Governu Konstitusional lolo'os lalika ta'uk hasai hotu tiha embaixadores sira ne'ebe nomeia on a husi Prezidente da Republika tan ba sira ne'e maioria husi partidu ida ninia emar maske serbisu nanis on a iha MNEK
“Lolo’os Primeiru Ministru VIII Governu konstitusional lalika haruka tan embaixadores sira ne’ebe nomeia ona husi VII Governu konstitusional tan ba embaixador sira ne’e la’os hili husi Primeiru Ministru VIII Governu Konstitusional nune’e dala ruma sira sei la defende Politika husi Primeiru Ministru atual ninian,” dehan A. A. Xavies de Araujo, estudante ida husi UNTL.
