Administradór Munisípiu Manufahi, Arantes Isac Sarmento informa, dala-barak servisu ne'ebé sira halo sempre uza internet hodi haruka relatóriu ba iha governu sentrál.
Nia sempre enfrenta problema prosesamentu rede ka liña internet ne'ebé la'o tarde, difikulta tebes sbainhira atu manda relatóriu ruma, lori tempu loron ida to'o rua mak foin bele la'o di'ak.
"Ha'u mós iha preokuparasaun ida hanesan ne'e, liuliu kona-ba liña internet, agora sé ita monta sala vídeu konferénsia, maibe ha'u hanoin envia kapasitasaun internet iha ne'e paradu, dala-barak kuandu iha ne'e tempu udan, ne'e liña internet mak araska fali, ne'e kuandu udan," Arantes Isac Sarmento informa ba www.tempotimor.com hafoin hasoru malu ho ofisiál MAE, UNDP no tekniku husi kompañia R2M, iha nia knaar fatin, administrasaun munisipál Manufahi, kinta (11/02).
Nia dehan, bainhira iha tempu bailoron rede internet sempre lao di'ak, maibé bainhira akontese anin-boot, liña internet sempre araska.
"Ne'ebé imi hanoin took ba, ita instala karik, sé kuandu iha vídeu konferénsia ne'e labele falla iha-ne'ebá, atu nune'e informasaun sira-ne'ebé maka la'o, ita bele fó-sai ho di'ak," dehan nia.
Nia konta, esperiénsia dala ida hatudu ona katak, antes ne'e sira tenta haruka relatóriu anuál ba iha sira-nia parseiru balu iha nasaun Kuba, maibé hetan fallansu iha rede internet, tanba prosesu tarde.
"Ida-ne'e mak ha'u hanoin presizs duni kompañia atu haree took ba iha-ne'e, nune'e bele halo partisipasaun di'ak liután ba iha vídeu konferénsia sira-ne'e," nia katak.
Maske nunee, nia konsidera katak, ho instalasaun portál munisipál ba faze daruak bele fó servisu espesífiku liután, atu bele integra lalais dadus sira ba hodi públiku bele asesu.
Entretantu, munisípiu Manufahi kompostu husi Postu Administrativu Alas, Fatuberlihu, Same ho Turiskai.
Hosi Postu Administrativu haat ne'e iha suku hamutuk 29, aldeia 137, ho totál populasaun hamutuk 70.739.
Hosi totál populasaun 70.739 ne'e kompostu husi mane 35.339 no feto hamutuk 34.900 no xefe família hamutuk 15.940.(*)