Liga ba prosesu dezempregadu ba servisu na'in sira ne'e, Diretór Nasionál Administrasaun Planeamentu no Finansas, Agapito da Costa klarifika ba publiku katak, ema na'in 10 ne'ebé hapara ona sira nia servisu ne'e nu'udár voluntáriu iha SNAEM,IP la'os funsionáriu kontratadu ka permanente.

"La'ós hapara funsionáriu, Maibé hapara voluntáriu sira ne'ebé halo servisu iha área ambulánsia ninian, ida ne'e hapara la'ós tanba iha intensaun atu subtitui fali ema seluk, maibé komforme lei Funsaun Públiku mós la fó dalan," Dehan Nia ba www.tempotimor.com iha nia knaar fatin, Kaikoli, Tersa (9/2).

Nia mós dehan, SNAEM,IP instituisaun foun, entaun fatin seidauk naton atu akumula ema na'in 10 ne'e, tanba fatin ne'ebé agora utiliza ne'e servisu diresaun nasionál ospitalaria nian.

"Jestór sira iha SNAEM,IP nian iha enkontru ida ne'ebé hodi deskuti mós kona-ba risku sira bainhira ita absorve voluntáriu sira ne'e, tanba laiha baze fundamentu wainhira hetan dezastre ruma ka husi uma mai servisu fatin ka hakat liu ba fatin seluk ne'e nia konsekuénsia mak familia sira sei fila-fali mai jestór SNAEM ninian, entaun ho razaun sira ne'e hotu mak ami tetu no hola desizaun atu hapara temporáriu," Nia esklarese

Iha desizaun ba hapara ema na'in 10 voluntáriu ne'e, SNAEM,IP fó mós notifikasaun ba sira katak, bainhira prosesu rekrutamentu ruma ne'ebé instituisaun refere loke iha futuru traballadór sira bele mai aplika fali, tanba sira treinadu ona iha area ambulansia nian.

"Pesoal sira ne'ebé na'in 10 foin lalais hasai ne'e, ninia istorikal sira hetan kontratu ba fundu Covid ninian ne'ebé selebra husi Ministériu Saude atu apoiu ba iha área ambulansia asistensia médika ninian, maibé iha kontratu balun remata ona iha Juñu 2019 no balun remata ona iha Dezembru 2019.

"Bainhira kontratu ne'e hotu, kolega sira ne'e hakarak atu mai servisu voluntáriu kontinua fó apoiu ba iha área ambulansia ninian, maibé haree ba espasu, entaun SNAEM,IP deside hapara apoiu servisu voluntáriu hirak ne'e iha 29 Janeiru 2021.

Antes ne'e, ema sira ne'ebé hala'o servisu voluntáriu iha SNAEM,IP hamutuk na'in 11, maibé na'in ida konsege pasa iha selesaun rekrutamentu funsionáriu públiku nian ne'ebé Ministériu Saúde hala'o, no na'in 10 mak voluntáriu hela iha SNAEM,IP.(*)