Nia dehan, fundu ba Covid-19 nian parte MAP prevé ona orsamentu, nune'e prosesu tenderizasaun la'o hela, iha tempu besik, sei fahe ba komunidade agrikultór sira.

"Adubu, iha orsamentu Covid nian propoin hela, agora tenderizasaun la'o hela tuir ninia marketing presu ne'ebé mak mai", dehan MAP, Pedro dos Reis, iha knaar fatin, edifísiu MAP, Comoro, kinta (04/02).

"Ami propoin orsamentu ne'e para atu fahe de'it ba komunidade sira", tenik Nia

Antes ne'e, iha tinan 2020 MAP distribui ona adubu balun, ba komunidade agrikultór sira.

"Adubu antes, segundu époka ne'ebé iha 2020 nian ba tiha ona, primeiru époka agora prosesu la'o hela ho orsamentu Covid nian",dehan Nia

Governante ne'e afirma, MAP produz adubu, maibé nia kuantidade menus.

"Iha adubu harmonik ne'ebé mak agora ita tenke hatene katak, iha fatin barak CCT adubu sira produz, maibé nia kuantidade mak la to'o", Nia afirma

Entretantu, dadaun ne'e, MAP obta hela harmonia, ne'ebé iha hela prosesu tenderizasaun.

Iha sorin seluk, Koordenadór ba kooperativa Malubai, husi Postu-Administrativu Venilale, Munisípiu Baucau, Juvito Zeferino Guteres, lamenta ho folin adubu ne'ebé dadaun sa'e maka'as.

"Agora dadaun, iha tinan ida ne'e, agrikultór sira iha Munisípiu Baucau Postu-Administrativu Venilale hasoru dezafius boot ida, mak folin pupuk ne'ebé sa'e, hanesan pupuk metan ho nia folin kada saka ida $ 85-90 dolares, pupuk ida mutin kada saka ida ho folin $65 dolar, diferensa boot ho tinan kotuk liu-ba, pupuk metan kada saka ida ho de'it folin $60 no mutin kada ida ho folin $55 dolar", dehan Nia

Tanba ne'e, Juvito Zeferino , husu ba governu liu-liu Ministériu Agrikultura no Peskas (MAP), atu bele haree ba kestaun refere.

"Realidade iha Timor-Leste (TL) seidauk produz pupuk rasik, hodi bele fasilita agrikultór, hodi utiliza atu hasa'e produsaun, tanba ita sei dependénsia ba pupuk ne'ebé maka importa husi rai liur", Nia dehan. (*)