Deputadu Noé lamenta desizaun husi PAM Baucau Olívio tanba desizaun ezonera funsionáriu kontratadu nakonu ho intensaun kór partidu nian sein haree ba tinan dedikasaun funsionariu refere ne'ebé mak mínimu balun tinan 3 no balun tinan 10 ona.
"Hanesan Baucau Oan, ha'u sente ladún konfortável uitoan tanba ita hasai ema, invez ita tama ba hasai tiha funsionáriu kontratadu ne'ebé mak servisu kleur ona, pelumenus mínimu tinan 3 ba leten, balun to'o tán ona tinan 10 resin ita hasai tiha, ho razaun tanba ita kór la hanesan, ne'e kestionável. Kór la hanesan ita hasai, piór liután hili fali kór mak hasai," dehan Noé iha PN, tersa (02/02).
Deputadu bankada governu ne'e hatutan, totál funsionáriu ne'ebé ezonera husi PAM Baucau hamutuk na'in-98 ne'ebé maioria husi PLP nia militante hamutuk 57, tuir kedas CNRT hamutuk 39 funsionáriu no KHUNTO funsionáriu na'in-2.
"Ha'u iha dadus, tanba ne'e mak ha'u koalia," dehan Noé
Iha fatin hanesan Deputada FRETILIN, Helena Martins Belo hatete, informasaun ne'ebé hato'o husi deputadu Noé ne'e akontese duni maibé funsionáriu sira-ne'e kontratu remata antes PAM Baucau Olívio toma posse, mesmu hanesan ne'e agora daudaun funsionáriu sira hela de'it na'in-14 mak sei aprezenta hikas dokumentu.
"Los duni, sira-nia kontratu remata iha 31 dezembru, entaun dia 12 Janeiru mak Prezidenti Autoridade Tomada de posse no agora mak prosesu hela oinsá mak sira atu aprezenta fali dokumentu," dehan Helena.(*)
