Ministru Finansa Rui Gomes, hateten janela únika ne'e lansa iha Ministériu Finansa, ohin.

"Parte ida atu ajuda servisu iha alfándega para kolleta reseita nomoos transparante liu, evita korrupsaun efisiénsia, komersiál sira mós bele utiliza fasilidade ida-ne'e para atu hetan mós informasaun husi entidade reguladora sira," dehan nia hafoin sorumutu ho Primeiru Ministru Taur Matan Ruak, iha Palásiu Governu, segunda (01/02/21).

Janela únika ne'e katak, entidade reguladora sira tama hotu iha-ne'ebá.

"Agora ita loke janela únika, janela únika ne'e katak, entidade reguladór sira mak depois tama hotu iha- ne'eba para ema la presiza halai tún sa'e, liu de'it husi janela úniku ida-ne'e bele hatene informasaun sira hatene hira mak tenki selu, hira mak tenki tama kofre estadu," nia esklarese

Antes ne'e mós Ministériu Finansa aprezenta ona opsaun polítika lejizlativa rejime jurídiku ba aprovizionamentu daudaun prepara hela lei.

"Agora ami prepara hela lei, purtantu fulan ne'e bele prontu ona depois sei aprezenta iha Konsellu Ministru", tenik nia.

Iha opsaun polítika lejizilativa rejime jurídiku ba aprovizionamentu ne'e sei halo revizaun hotu kedas ba artigu hamutuk 115.

"Ita sei halo dekretu lei ida de'it, ne'e para labele iha konfuzaun, purke agora daudaun ne'e barak atu uza ida- ne'e, rejime espesiál buat sira-ne'e hotu, tanba ne'e ita utiliza lei ida de'it para labele konfuzaun ba ema iha interpretasaun", dehan nia. (*)