Fidelis akresenta, atu halo transferénsia osan husi Banku Central Timor-Leste, la presiza halo deliberasaun ida iha konsellu ministru, tanba Ministériu Finansas halo de'it pedidu transferénsia ida ba, no bele transfere ona mai.
"Maibé, atu dehan buat ida katak, bainhira ita rai osan iha ema nia rain, iha Amérika ne’eba, banku rezerva federál Amérika husi tempu ida ba tempu seluk, osan nia funan ne'e tun sa'e, momentu ida agora osan funan diak", nia hateten ba jornalista hafoin reuniaun Konsellu Ministru estraordinariu iha palasiu Governu, Sesta (08/01).
Bainhira osan iha funan diak, nia hatutan, tenke husik tiha lai atu bele hetan osan husi funan, eh bainhira kofre osan sei iha hela la presiza dada lai osan ne'e.
"Tanba, se ita dada karik sedu liu, bainhira ita nia kofre sei iha karik mak ita dada sedu liu, saida mak akontese, ita lakon fali husi retornu investimentu ne'ebe devia ita hetan", nia esplika.
Nune'e, desizaun ne'ebé governu halo ne'e klaru katak, pur enkuantu osan iha kofre estadu sei iha, sidauk nesesáriu halo pedidu transferénsia.
"Ita nia osan ne'ebé mak iha Amerika, agora funan aas, ne'ebé keta dada ansi lai, tanba kofre sei iha", nia subliña.
Tanba, bainhira dada mai tiha, tau halo osan nakonu iha ne'e de'it mak laiha funan entaun Timor sei lakon, sa tan osan kofre estadu naton hela.
"Ne'ebé ideia ida ne'e kabe ba Ministériu Finansas mak halo kálkulu hirak ne'e", nia tenik.
Fidelis argumenta, labele dada ansi ne'e la'os dehan, Timor-Leste laiha dalan atu foti ninia osan iha banku rezerva federal Amerika, ne'e la’e.
"Mais ida ne'e la'ós, tanba de'it ita labele dada osan mai husi Amérika ne’eba, tanba ha’u haree iha momentu balun Timor-Leste labele dada osan mai. Informasaun klaru loos ona ate Primeiru Ministru mos ko'alia kona-ba ida ne'e katak, informasaun ne'e laloos", nia hakotu. (*)