Deputadu Ricardo ko’alia ne'e tanba nia hare katak kareta kompaña barak dalaruma kondisaun ladun diak ona, maibe kontinua obriga tula rai-henek ka kerikil no halai ba hamonu estraga de'it iha dalan públiku hodi fo perigu ba movimetasaun transporte hanesan motorizada.
Atu evita kestaun ne'e, nia husu ba ministeriu kompetente atu hare oinsa mak bele halo kontrolu makaas ba asuntu ida ne'e, nune'e bainhira sira tula rai henek karik, sasan sira ne'e labele monu iha dalan.
"Sira ne'ebe serbisu ba projetu sira ne'ebe hala'o sira nia funsaun, sira tula sasan, kuandu la tau ho diak, entaun Kerikil ka rai-henek ne'ebe sira tula ne'e monu hela iha dalan sira ne'e, depois hamosu fali asidente seluk,"Deputadu Ricardo Baptista Ko’alia iha plenária Parlamentu Nasional (PN), segunda (21/12).
Hatan ba kestaun ne'e Sekretariu Estadu Komunikasaun Sosial (SEKOMS) Juvinal Acara deklara, kona-ba preokupasaun ida ne'e governu rejista ona, no sei entrega ba Ministeriu ne'ebe tuteladu ba asuntu ne'e hodi bele buka solusaun.
"Hanesn babain preokupasaun ne'ebe hato'o husi destintius deputadu no deputada, governu rejista ona no sei enkamina kada ba ministeriu ida-idak," nia dehan. (*)