Ministru Prezidénsia Konsellu Ministru, Fidelis Manuel Leite Magalhães informa, Konsellu Ministru aprova ona projetu deliberasaun nian, ho alterasaun, ne'ebé aprezenta husi Ministru Obras Públikas, Salvador Soares dos Reis Pires, kona-ba aprovasaun husi prosedimentu aprovizionamentu ba suplementu, ka alterasaun.
"Antes ne'e, iha ona estensaun kontratu ba kontraktor sira, komu kontrator iha nia kontratu iha estensaun, entaun naturalmente tenke halo mos estensaun ba iha konsultor ne'ebe superviziona, tanba se lae, kontraktor mak la'o, depois superviziona laiha", Fidelis hateten lia hirak ne’e hafoin reuniaun Konsellu Ministru iha palasiu Governu, Kuarta (16/12).
Tanba ne'e, ohin halo mos estensaun kontratu ba iha supervizaun, supervizor nia servisu, entaun ida ne'e mak Konsellu Ministru aprova.
Entretantu, antes ne'e Primeiru Ministru Taur Matan Ruak durante debate OJE 2021 iha Parlamentu Nasional dehan iha tinan ida-ne’e, sura ho empréstimu husi Ajénsia Japoneza ba Kooperasaun Internasionál (JICA), Banku Dezenvolvimentu Aziátiku (ADB) no Banku Mundiál, Timor Leste sei aloka dolar millaun 180 ba konstrusaun no hadi’a estrada no ponte sira iha nasaun ne'e.(*)
